2025-ci il noyabrın 7-də Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı Türkiyənin Ardahan Universitetinin məzunu, azərbaycanlı şəhid Mustafa Kərimovun adını əbədiləşdirən konfrans salonunun açılışında iştirak etdi.

Açılış mərasimində Azərbaycanın Karsdakı baş konsulu Zamin Əliyev, Azərbaycanın Türkiyədəki səfirliyinin təhsil müşaviri Dos.Dr. Nəcibə Nəsibova, Ardahan Universitetinin rektoru Prof. Öztürk Emiroğlu, Ardahan Vali vəkili Mehmet Sert, universitetin professor-müəllim və inzibati heyəti, eləcə də çoxsaylı tələbələr, şəhid Mustafa Kərimovun ailəsi, Azərbaycan Milli Məclisinin deputatları prof. Anar İskəndərov və Şahin İsmayılov, Xəzər Universiteti Dillər və ədəbiyyatlar departamentinin müdiri Dos. Dilbər Zeynalova və digər qonaqlar iştirak etdilər.    

Rəsmi hissədə çıxış edən natiqlər Azərbaycan xalqının qazandığı Qarabağ Zəfərinin tarixi əhəmiyyətindən, şəhidlərin əziz xatirəsinin uca tutulmasının vacibliyindən, eləcə də Qarabağ mövzusunun elmi və ədəbi müstəvidə işıqlandırılmasının önəmindən danışdılar.

Axşam Karsdakı Ahmet Arslan Konqres və Mədəniyyət Mərkəzində Qarabağ Zəfərinin 5 illiyinə həsr olunmuş böyük konsert proqramı təqdim olundu.  Baş konsul Zamin Əliyev “Vətən savaşında qazandığımız zəfəri torpaqlarımız uğrunda canını fəda edən igidlərimizin ruhuna borcumuz” kimi dəyərləndirdi. Hamlet İsaxanlı  çıxışında Türkiyə-Azərbaycan qardaşlığının tarixindən, 44 günlük müharibənin ilk günlərindən Türkiyənin Azərbaycanın yanında yer almasından bəhs etdi. Çıxışçılar arasında Kars Vali vəkili Hayrettin Buğra Güzel, AK Partiyasının Millət vəkili Adem Çalkın var idi.

 Çıxışlardan sonra Qarabağ Zəfərinə həsr olunmuş şeir yarışmasının qalibləri mükafatlandırıldı. 1-ci yerin qalibinə mükafatı  Hamlet İsaxanlı təqdim etdi.

 Sonda  Hamlet İsaxanlıya ən ali qonaq olaraq Türkiyə bayrağı təqdim olundu.