2025-ci il noyabrın 7-də Türkiyənin Kars şəhərindəki Kafkas Universitetinin Çağdaş Türk ləhcələri və ədəbiyyatları bölümünün və Azərbaycanın Kars şəhərindəki Baş Konsulluğunun təşəbbüsü ilə Heydər Əliyev tədris mərkəzində Xəzər Universitetinin təsisçisi, Direktorlar və Qəyyumlar Şurasının sədri Prof.Akad.  Hamlet İsaxanlının “Mənim Qarabağım və ya Qarabağ düyünü” kitabının təqdimatı keçirilib.

    Tədbiri giriş sözü ilə açan Kafkas Universitetinin Çağdaş Türk ləhcələri və ədəbiyyatları bölümünün müdiri Prof. Dr. İlkin Qulusoy hörmətli qonağı və iştirakçıları salamladı, tədbirin Qarabağ Zəfərinin 5 illiyinə həsr olunduğunu vurğuladı. Azərbaycanın Kars şəhərindəki baş konsulu Zamin Əliyev  Hamlet İsaxanlını qonaqlara təqdim edərək, qısaca kitabın əhəmiyyətindən bəhs etdi. Sonra məruzəçilər - Azərbaycanın Türkiyədəki səfirliyinin təhsil müşaviri Dos.Dr. Nəcibə Nəsibova, Kafkas Universitetinin rektoru Prof. Hüsnü Kapu, Iğdır Universitetinin rektoru Prof. Ekrem Gürel, Kafkas Universitetinin prorektoru Prof.Dr. Selcuk Ural Azərbaycan xalqının qazandığı Qarabağ Zəfərinin tarixi əhəmiyyətindən, “Mənim Qarabağım və ya Qarabağ düyünü” əsərinin indiki və gələcək nəsillər üçün əhəmiyyətindən söz açdılar.

Kafkas Universitetinin müəllimi Könül Qulusoy  Qarabağ mövzusunun elmi və ədəbi müstəvidə işıqlandırılmasının önəmindən, əsərin ədəbi-fəlsəfi məzmunundan, Qarabağ həqiqətlərinin bu kontekstdə təqdimatının yeniliyindən, Azərbaycan milli yaddaşının qorunmasında əhəmiyyətindən bəhs edən geniş elmi məruzə ilə çıxış etmişdir. Məruzəçi vurğuldı ki, Hamlet İsaxanlının əsəri Qarabağ müharibəsinin təkcə tarixi və siyasi deyil, həm də mənəvi və ideoloji tərəflərini dərin elmi-ədəbi müstəvidə əks etdirən mühüm bir nümunədir. Məruzə müəllif və iştirakçılar tərəfindən böyük maraqla qarşılandı və geniş müzakirələrə səbəb oldu.

    Tədbirdə Kafkas Universitetinin Çağdaş Türk ləhcələri və ədəbiyyatları bölümünün Azərbaycan dili və ədəbiyyatı ixtİsasının tələbələri Hamlet İsaxanlının şeirlərini səsləndirdilər. Tədbir iştirakçılarının xahişi ilə  Hamlet İsaxanlı özünün “ Hələ ki gedirik üzü sabaha” şerini oxudu.

     Azərbaycanın Türkiyədəki səfirliyinin təhsil müşaviri Dos.Dr. Nəcibə Nəsibova Azərbaycan və Türkiyə arasında qardaşlıq münasibətlərinin, elmi və mədəni əlaqələrin daha da möhkəmləndirilməsində xidmətlərinə görə Prof.Akad. Hamlet İsaxanlıya mükafat təqdim etdi. Öz növbəsində.Hamlet İsaxanlı da Kafkas Universitetinnin rektoru Prof.Dr. Hüsnü Kapu`ya göstərdikləri diqqətə görə hədiyyə verdi.