2025-ci il noyabrın 12-də Xəzər Universiteti Psixologiya Departamentinin əməkdaşı və Xəzər Psixoloji Xidmət Mərkəzinin psixoloqu Mirsadiq Muxtarov “Tehsil365” xəbər saytına müsahibə vermişdir. Psixoloq son illərdə ən yaxşı universitetlərə daxil olan, lakin həyat bacarıqları zəif olan gənclərin sayının artması ilə bağlı fikirlərini bölüşmüşdür.

O bildirib ki, bu tendensiyanın əsas səbəbi cəmiyyətdə, təhsil sistemində və ailə tərbiyəsində akademik nailiyyətin həyat bacarıqlarından üstün tutulmasıdır. Uğur çox zaman attestat göstəriciləri, imtahan balları və diplomlarla ölçüldüyündən, uşaqların emosional inkişafı, sosial adaptasiya bacarıqları və daxili potensialı arxa planda qalır. Mirsadiq Muxtarov vurğulayıb ki, empatiya, emosional tənzimləmə, qərarvermə və məsuliyyət kimi həyati bacarıqlar səhv etmək və çətinliklərlə üzləşmək təcrübəsindən formalaşır, lakin yüksək nəticəyə həddindən artıq fokuslanma bu inkişafı məhdudlaşdıra bilər.

Psixoloq yekunda bildirib ki, problemin həlli üçün yalnız akademik biliklərin artırılması kifayət deyil. Məktəb və ailə mühitində emosional intellektin, tənqidi düşünmənin və həyati bacarıqların sistemli şəkildə inkişaf etdirilməsi gənclərin həm akademik, həm də real həyatda psixoloji cəhətdən dayanıqlı olmasına şərait yaradır.

Müsahibənin tam versiyası aşağıdakı linkdə:

https://tehsil365.news/az/news/46127/