2025-ci il noyabrın 7-də Xəzər Universitetində Fizika və elektronika departamentinin müdiri, Dos. Fəridə Tatardar tərəfindən “Piezoelektrik enerjinin yığılması texnologiyaları” mövzusunda elmi seminar təşkil olunub.

Tədbirdə universitetin professor-müəllim heyəti, tədqiqatçılar və tələbələr iştirak ediblər. Seminarda bərpa olunan enerji mənbələrinin müasir dünyada rolu, piezoelektrik enerjinin əldə olunması prinsipləri, bu sahədə son texnoloji yeniliklər və gələcək tədqiqat istiqamətləri barədə ətraflı təqdimatlar nümayiş etdirilib.

Fəridə Tatardar çıxışında qeyd edib ki, piezoelektrik texnologiyalar vasitəsilə mexaniki enerjinin elektrik enerjisinə çevrilməsi gələcəkdə davamlı və ekoloji cəhətdən təmiz enerji istehsalı üçün mühüm potensiala malikdir. O, həmçinin bu sahədə aparılan beynəlxalq tədqiqatlardan və tətbiq nümunələrindən danışıb.

Seminar interaktiv müzakirələrlə davam edib, iştirakçılar öz suallarını ünvanlayaraq, fikir mübadiləsi aparıblar. Tədbirin əsas məqsədi piezoelektrik enerji sahəsində elmi biliklərin paylaşılması, yeni əməkdaşlıq imkanlarının yaradılması və tədqiqatçıların bu istiqamətə marağının artırılması olub.

Seminar iştirakçılar tərəfindən böyük maraqla qarşılanıb və faydalı elmi mübadilə platforması kimi qiymətləndirilib.