2025-ci il oktyabrın 28-də Xəzər Universitetinin Mərmər zalında universitetin Musiqi və incəsənət departamentinin təşkilatçılığı ilə universitetin “Üz-üzə” layihəsi çərçivəsində məşhur pianoçu və pedaqoq, Əməkdar incəsənət xadimi, hazırda ABŞ - ın Kaliforniya ştatının San - Xose Universitetinin professoru Namiq Sultanovun yaradıcılığına həsr olunmuş tədbir keçirildi. Tədbirdə universitetin rəhbərliyi və əməkdaşları, ölkənin tanınmış mədəniyyət və incəsənət xadimləri, qonaqlar iştirak edirdilər.

Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanl iştirakçıları və qonaqları salamlayaraq qeyd etdi ki, universitet yarandığı gündən mədəniyyət və incəsənət üzrə fənlərdən biri tələbələr üçün məcburi müəyyən edilmiş və ölkənin musiqi və incəsənət xadimləri, o cümlədən bu gün qonağımız olan ustad pianoçu Namiq Sultanov bu mürəkkəb işin təşəkkülündə univesitetə mühüm yardım göstərmişlər. Universitetdə yaranmış Musiqi və incəsənət departamenti bu sahədə yüksək təşkilatçılıq göstərmiş və bu gün də tanınmış pianoçu, əməkdar müəllim Zülfiyyə Sadıqovanın rəhbərliyi ilə bu iş uğurla davam etdirilir.

Azərbaycanın xalq artisti Prof. Gülnaz İsmayılova çıxış edərək, ilk addımlarını Namiq Sultanovun sinfində fortepiano ilə başladığını və sonrakı uğurlarının müəlliminin adı ilə bağlı olduğunu söylədi.

Xəzər Universiteti Musiqi və incəsənət departamentinin müdiri Zülfiyyə Sadığova Namiq Sultanovun Azərbaycanda sonuncu tələbəsi olduğunu fəxrlə nəzərə çatdırdı və uğurlarına görə müəlliminə minnətdarlığını bildirdi.

“Qızıl qələm” media mükafatı, “Xarı bülbül” laureatı, Əməkdar incəsənət xadimi, Bakı Musiqi Akademiyasının professoru Elnarə Dadaşova, Dövlət “Qaya” ansamblının direktoru, sənətşünaslıq üzrə fəlsəfə doktoru Turan Məmmədəliyeva çıxış edərək, görkəmli sənətkar haqqında ürək sözlərini tamaşaçılarla bölüşdülər.

Tədbirdə Namiq Sultanovun ailə üzvləri olan musiqiçilər - həyat yoldaşı Sevil Sultanova, Nərminə və Nigar Sultanovalar da iştirak edirdilər.

Tədbir boyu iştirakçılara Xəzər Universiteti Kamera orkestrinin (bədii rəhbər Zülfiyyə Sadıqova, dirijor Hüseyn Kərimov) müşayiəti ilə maraqlı konsert proqramı təqdim olundu.

Kamera orkestri tərəfindən Qara Qarayevin “Yeddi gözəl” baletindən “Aişənin rəqsi”, Arif Məlikovun “İki qəlbin dastanı” baletindən “Qızların rəqsi” ifa olundu. Xalq artisti Gülnaz İsmayılova Luici Arditi`nin “İl baço” romansını, Fikrət Əmirovun “Sevil” operasından Dilbərin mahnısını və “Səndən mənə yar olmaz” xalq mahnısını, Xəzər Universiteti Kamera orkestrinin ifaçısı Emil Hüseynov Xəyyam Mirzəzadənin “Şur”, Azərbaycan Milli Konservatoriyasının fortepiano müəllimi Mətanət Azmanlı Xalq artisti Sərdar Fərəcovun “Cıdır düzündə bayram” əsərlərini, Nərminə və Nigar Sultanovalar Bramsın “Macar rəqsi”ndən 5-ci və 6-cı nömrələri ifa etdilər.

Xəzər Universitetinin rektoru Raziyə İsayeva Namiq Sultanova Xəzər Universiteinin hədiyyəsini təqdim etdi.

Sonda Namiq Sultanov tədbirin yüksək səviyyədə təşkilinə görə Xəzər Universitetinə dərin təşəkkürünü bildirdi.