Xəzər Universitetinin Kitabxana-İnformasiya Mərkəzinin (KİM) direktoru Aytac Misgərli 2025-ci il noyabrın 4-6-da Ankara şəhərində, Türkiyə Cümhurbaşqanlığı Millət Kitabxanasında keçirilən “ANKOSLink – 2025” Beynəlxalq Konfransında iştirak etmişdir.

Konfransın açılış mərasimi Türkiyə Cümhurbaşqanlığı Millət Kitabxanasının Dairə Başqanı Ayhan Tuğlu, ANKOS (Anadolu Üniversitet Kitabxanaları Konsorsiyumu) prezidenti İsmail Çeyinkaya və Türkiyənin təhsil naziri Erol Özvar`ın çıxışları ilə başlamışdır.

Bu il “Kitabxana 5.0 və İnsan Mərkəzli Rəqəmsal Transformasiya” mövzusuna həsr olunan “ANKOSLink - 2025” Türkiyə və regionun nəşriyyat, açıq elm və kitabxana informasiya xidmətləri üzrə ən nüfuzlu platformalarından biri kimi 30-dan çox ölkədən mütəxəssisləri bir araya gətirmişdi.

Üç gün davam edən konfransda bu mövzularda panel müzakirələri və təqdimatları keçirilmişdir: “Kitabxana 5.0 modeli və insan yönümlü rəqəmsal xidmətlər”, “Rəqəmsal məzmunların uzunmüddətli qorunması və davamlı əlçatanlıq”, “Süni intellekt və etika”, “Akademik tədqiqatlarda süni intellekt əsaslı alətlər”, “Süni intellekt texnologiyalarının kitabxana fəaliyyətinə təsiri”.

Tədbir çərçivəsində Wiley, IEEE Xplore, SOBIAD, JoVE, Sage, Muteferriqa, Elsevier, EBSCO və digər beynəlxalq nəşriyyat və verilənlər bazalarının nümayəndələri ilə görüşlər keçirilmiş, əməkdaşlıq perspektivləri və yeni platformalar müzakirə olunmuşdur.

Konfransın rəsmi bağlanış mərasimi Türkiyə Respublikasının Prezidenti Rəcəb Tayyib Ərdoğanın iştirakı ilə həyata keçirilmişdir.

Azərbaycanı tədbirdə Xəzər Universiteti ilə yanaşı, Elm və Ali Təhsil üzrə Dövlət Agentliyinin

şöbə müdiri, eləcə də Bakı Dövlət Universiteti, Milli Aviasiya Akademiyası, UNEC, Azərbaycan Tibb Universiteti, Azərbaycan Dillər Universiteti, Naxçıvan Dövlət Universiteti, Azərbaycan Nəşriyyatı və Bakı Xoreoqrafiya Akademiyasının kitabxanalarının rəhbərləri təmsil etmişdir.