Xəzər Universitetinin Memarlıq və Dizayn Departamenti tərəfindən “Yurtdışı Türklər” və “Ufuk Planlama” şirkətinin təşkilatçılığı ilə 27–31 oktyabr 2025-ci il tarixlərində həyata keçirilən “Kənt Orman Yaşam Atölyesi” Multidisiplinar Məkansal Planlama Təlimi uğurla başa çatıb. Bağlanış tədbirində Xəzər Universitetinin Təbiət Elmləri və mühəndislik fakültəsinin dekanı Fəxrəndə Əlimərdanova çıxış edərək, layihənin əhəmiyyətini vurğulamış və iştirakçıları əldə etdikləri nailiyyətlər münasibətilə təbrik etmişdir.

Beş gün davam edən təlim çərçivəsində Xəzər Universitetinin Memarlıq və dizayn departamentinin memarlıq və dizayn ixtisaslarının tələbələri, Memarlıq və İnşaat Universitetinin SABAH qrupları, həmçinin Türkiyənin bir çox tanınmış universitetlərinin memarlıq ixtisası tələbələri birgə əməkdaşlıq şəraitində işləyərək seçilmiş ərazinin abadlaşdırılması və yeni universitet kampusunun planlaşdırılması üzrə yaradıcı və innovativ layihələr hazırlayıblar.

Yekun mərasimdə tələbələr hazırladıqları layihələri münsiflər heyətinə təqdim ediblər. Münsiflər heyətində Xəzər Universitetinin Memarlıq və dizayn departamentinin müdiri Dos. Dr. Şəhla Abbasova, eləcə də müəllimlər Sevinc Həsənova, İlahə Təhməzli , Fatma Ataşkaya, Günay Məmmədova və assistent Cəmilə Səfərova iştirak ediblər. Layihənin beynəlxalq tərəfdaşları sırasından isə Dr. Nejla Kılınç (“Ufuk Planlama” Şirkəti və Kent Orman Yaşam Atölyesinin qurucusu), Prof. Dr. Halim Perçin (Ankara Universiteti), Aydoğan Kılınç (“Ufuk Planlama” Şirkəti) və memar Kübra Ergül münsif qismində çıxış ediblər.

Münsiflər təqdim olunan işləri yüksək qiymətləndirərək, tələbələrin komanda ruhunu, memarlıq baxışını və yaradıcı düşüncə tərzini xüsusi vurğulayıblar. Layihə rəhbəri, “Ufuk Planlama” Şirkəti və Kent Orman Yaşam Atölyesinin qurucusu Dr. Nejla Kılınç çıxış edərək, təlimin uğurla başa çatmasından məmnunluğunu bildirib. O, layihə müddətində tələbələrin göstərdikləri yaradıcılığı, əməkdaşlıq bacarığını və ekoloji düşüncəyə əsaslanan yanaşmalarını yüksək qiymətləndirib: “Bu beş gün ərzində biz təkcə bir layihə hazırlamadıq, həm də fərqli ölkələrdən gələn gənclərin bir-birini daha yaxından tanımasına, fikir mübadiləsi aparmasına və birgə öyrənməsinə şahid olduq. Tələbələr yalnız memarlıq baxımından deyil, həm də sosial və ekoloji dəyərlər baxımından çox zəngin ideyalar təqdim etdilər.”

Dr. Kılınç əlavə edib ki, bu layihə tələbələr üçün həm peşəkar, həm də insani inkişaf təcrübəsi olub. Onun sözlərinə görə, layihə ərzində iştirakçılar “Kənt Orman Yaşamı” konsepsiyasını yalnız dizayn səviyyəsində deyil, həm də təbiət, insan və məkan harmoniyası kimi dərk etməyi bacarıblar. Sonda o, Xəzər Universitetinin Memarlıq və izayn epartamentinə, “Yurtdışı Türklər” təşkilatına və “Ufuk Planlama” şirkətinə təşəkkürünü bildirib: “Bu layihə beynəlxalq əməkdaşlığın nə qədər dəyərli olduğunu bir daha göstərdi. İnanıram ki, bu təcrübə gələcəkdə daha böyük layihələrin başlanğıcı olacaq.”

Təqdimatlardan sonra bütün iştirakçılara sertifikatlar təqdim olunmuş, bununla da layihə rəsmi şəkildə bağlanmışdır