2025-ci il noyabrın 11-də Beynəlxalq Münasibətlərin Təhlili Mərkəzində (BMTM) “Konstitusiya və Suverenlik ili”nə həsr edilmiş dəyirmi masa və bu mövzu ilə əlaqədar elan olunmuş müsabiqə qaliblərinin mükafatlandırılması mərasimi keçirilib. Xəzər Universitetinin Siyasi elmlər və fəlsəfə departamentinin müdiri Dos. Orxan Vəliyev və doktorantı Rahil Dadaşlı bu tədbirdə iştirak ediblər.

Dos. Vəliyev çıxışında müasir dövrdə suverenlik anlayışının məzmununa toxunub. O qeyd edib ki, milli suverenlik anlayışı artıq yalnız fiziki sərhədlərlə məhdudlaşmır, eyni zamanda, süni intellekt və texnoloji sahələrdə də öz əksini tapır. O, regional əməkdaşlığın vacibliyini vurğulayaraq, Prezident İlham Əliyevin andiçmə mərasimində Türk Dövlətləri Təşkilatının ölkəmiz üçün əhəmiyyəti ilə bağlı səsləndirdiyi fikirlərinə, eləcə də Azərbaycanın digər regional platformalardakı fəal iştirakının strateji önəminə diqqət çəkib.

Tədbir çərçivəsində BMTM tərəfindən cari ilin avqust ayında “Konstitusiya və Suverenlik ili”nə həsr edilmiş məqalə müsabiqəsinin qalibləri mükafatlandırılıb. Doktorant Rahil Dadaşlı üçüncü yerə layiq görülüb və “İkinci Qarabağ müharibəsindən sonra Cənubi Qafqazda geosiyasi dinamikanın təkamülü: Ermənistan və Azərbaycanın xarici siyasətinin yenidən istiqamətləndirilməsi” mövzusunda təqdimatla çıxış edib.

Keçid:https://aircenter.az/az/post/bmtm-de-konstitusiya-ve-suverenlik-iline-hesr-edilmis-deyirmi-masa-kecirilib-1940