2025-ci il noyabrın 5-də Xəzər Universitetində AMEA Arxeologiya və Antropologiya İnstitutunun İçərişəhərdə yerləşən Muzey-sərgi zalında praktik yönümlü II elmi-praktik təcrübə və onunla bağlı ilk “Könüllülük proqramı”na cəlb olunan iştirakçılar üçün növbəti ustad dərsi keçirilmişdir.

Proqramın rəhbəri, AMEA Arxeologiya və Antropologiya İnstitutunun Elmi ekspozisiya şöbəsinin müdiri, Xəzər Universiteti Tarix və arxeologiya departamentinin müəllimi Orxan Zamanov giriş nitqi ilə çıxış etdikdən sonra, AMEA Arxeologiya və Antropologiya İnstitutunun aparıcı elmi işçisi, Xəzər Universitetində Tarix və arxeologiya departamentinin müəllimi Dr. Yaqub Məmmədov tərəfindən “Daş dövrünün öyrənilməsi və əldə olunmuş nəticələr” mövzusunda elmi mühazirə təqdim olunmuşdur. Mühazirədə Daş dövrünə aid arxeoloji tapıntılar, onların elmi təhlili və bu dövrün Azərbaycan tarixində tutduğu yer ətraflı şəkildə izah edilmiş, iştirakçılarla maraqlı müzakirələr aparılmışdır. Tədbir gənc tədqiqatçılar və könüllülər üçün həm nəzəri, həm də praktiki biliklərin artırılması baxımından mühüm əhəmiyyət kəsb etmişdir.

Qeyd etmək lazımdır ki, Dr. Yaqub Məmmədov artıq 15 ilə yaxındır ki, Azərbaycan ərazisində daş dövrünə aid arxeoloji abidələrin tədqiqində fəal şəkildə iştirak etmiş və son illərdə aparılan bir sıra mühüm tədqiqatlara rəhbərlik etmişdir. Onun elmi fəaliyyəti bu sahədə dəyərli nəticələrin əldə olunmasına və qədim tariximizin daha dərindən öyrənilməsinə mühüm töhfələr vermişdir.

Eyni zamanda, vurğulamaq lazımdır ki, layihənin əsas tərəfdaşlarından biri olan Xəzər Universitetinin tələbələri də bu elmi təşəbbüsdə fəal iştirak etmiş, ustad dərsləri vasitəsilə arxeoloji biliklərini zənginləşdirmişlər.

Tədbirin sonunda layihə iştirakçılarının maraqlandığı suallar cavablandırılmış, müzakirələr aparılmışdır.