Xəzər Universitetinin Kimya və biologiya müəllimliyi ixtisası üzrə təhsil alan 4-cü kurs tələbəsi Günel Allahverdiyeva 1–5 sentyabr 2025-ci il tarixlərində Sloveniyanın Lyublyana Universiteti tərəfindən təşkil olunan Beynəlxalq Bioinformatika yay məktəbində iştirak etmişdir.

75 saatlıq proqram bioinformatika, data elmləri və həyat elmlərinə maraq göstərən müxtəlif ölkələrdən olan tələbə və gənc tədqiqatçıları bir araya gətirmişdir. Proqram çərçivəsində iştirakçılar həm mühazirələrdə, həm də praktiki məşğələlərdə iştirak edərək Linux və R proqramları vasitəsilə məlumatların analizi, molekulyar modelləşdirmə və bioloji verilənlər bazaları ilə işləmək üzrə bilik və bacarıqlar qazanmışlar.

Günel Allahverdiyeva üçün bu təcrübə beynəlxalq mühitdə əməkdaşlıq bacarıqlarını inkişaf etdirmək və sahənin aparıcı mütəxəssislərindən öyrənmək baxımından olduqca əhəmiyyətli olmuşdur. O, həmçinin Lyublyana şəhərinin zəngin mədəniyyəti və təbiəti ilə tanış olmuş, Sloveniya Milli Muzeyini ziyarət edərək proqramdan kənar mədəni təcrübələr də əldə etmişdir.

Bu yay məktəbində iştirak Günel Allahverdiyevanın akademik inkişafında mühüm mərhələ olmuşdur və tələbəmizə gələcək peşəkar fəaliyyətində uğurlar arzu edirik.