Xəzər Universitetinin Kitabxana İnformasiya Mərkəzinin (KİM) direktoru Aytac Misgərlinin moderatorluğu və bütün tərəfdaş universitetlərin iştirakı ilə 2025-ci il oktyabrın 27-də DIRNA layihəsinin 4-cü iş paketi üzrə növbəti onlayn görüş  keçirildi. Görüş “İnklüziv təhsildə əsas anlayışlar və mövcud tendensiyalar” mövzusuna həsr olunmuşdu.

Seminarda Xəzər Universitetinin koordinatoru olduğu DIRNA layihəsinin tərəfdaşı – Finlandiyanın Jyväskylä Universitetinin əməkdaşları Dr. Kati Clements və Saana Mehtälä çıxış edərək, “Gender bərabərliyi”, “İnklüziv təhsil  təcrübələri və dəstək sistemləri”, “Jyväskylä Universitetində inklüziv təhsil təcrübələri”, “İnklüziv təhsildə gələcək istiqamətlər və süni intellekt” kimi mövzular üzrə öz təcrübələrini iştirakçılarla bölüşdülər.

Çıxışlar zamanı inklüziv təhsilin əsas anlayışları və bərabər imkanların təmin edilməsi məsələləri ətraflı müzakirə olundu. Mütəxəssislər bütün fərdlərin tam şəkildə iştirak edə biləcəyi əlçatan və bərabər mühitlərin yaradılmasının vacibliyini vurğuladılar.

Seminar zamanı, həmçinin, fiziki imkanları məhdud tələbələrin təhsil prosesində qarşılaşdıqları çətinliklər və onların ehtiyaclarına uyğun fərdi tənzimləmələrin əhəmiyyəti müzakirə edildi. Clements və Mehtälä süni intellektin müxtəliflik və inklüzivlik sahəsində tətbiqi ilə bağlı tədqiqatların aparılmasının zəruriliyini qeyd etdilər.

Təqdimat iştirakçılar tərəfindən maraqla qarşılandı və inklüziv təhsil mövzusunda gələcək müzakirələrin davam etdirilməsi barədə razılıq əldə olundu.