Xəzər Universitetinin Neftçilər kampusunun Kitabxana İnformasiya Mərkəzində (KİM) Beynəlxalq Açıq Elm Həftəsi çərçivəsində 5 gün davam edən (20-24 oktyabr) məlumat  günləri təşkil edilib. Tədbirin məqsədi tələbə və tədqiqatçılar arasında açıq elmin prinsiplərinin təşviqi, eləcə də kitabxananın təqdim etdiyi informasiya və elmi resurslar haqqında məlumatlılığın artırılması olub.

İştirakçılara kitabxananın informasiya və elmi tədqiqat resursları, elektron bazalara çıxış  imkanları, məlumat axtarışı üsulları, həmçinin istifadəçi dəstəyi xidmətləri haqqında ətraflı məlumat verilib. Kitabxana əməkdaşları tərəfindən aparılan təqdimatlar vasitəsilə tələbələr elektron kataloqdan və beynəlxalq elmi bazalardan effektiv istifadə üsullarını öyrəniblər.

Tədbirlər zamanı tələbələr həm fərdi, həm də qrup şəklində sessiyalarda iştirak edərək, öz sorğu və suallarını kitabxana əməkdaşlarına ünvanlayıblar. Bu proses onların elmi məlumatlara çıxış bacarıqlarını inkişaf etdirməklə yanaşı, kitabxana resurslarından daha səmərəli yararlanmaq vərdişlərini də gücləndirib.

İştirakçılar tərəfindən böyük maraqla qarşılanan məlumat günləri kitabxananın maarifləndirici fəaliyyətinin əhəmiyyətini bir daha ortaya qoyub. Tələbələrə istənilən vaxt fərdi və ya qrup şəklində kitabxana əməkdaşlarına müraciət edə biləcəkləri, elmi tədqiqat və informasiya axtarışı ilə bağlı dəstək ala biləcəkləri barədə məlumat verilib.

Xəzər Universitetinin Kitabxana İnformasiya Mərkəzi gələcəkdə də tələbə və tədqiqatçılar üçün maarifləndirici tədbirlərin davam etdirilməsini planlaşdırır.