2025-ci il oktyabrın 24-də Xəzər Universitetinin Karyera və Məzunlar Mərkəzinin təşkilatçılığı ilə AIESEC Azərbaycan təşkilatının nümayəndələri ilə tələbələrin  görüşü keçirilmişdir. Görüş universitetin Neftçilər, Nərimanov və Bakıxanov kampuslarında təşkil olunmuşdur.

Tədbirin əsas məqsədi tələbələri AIESEC-in beynəlxalq mübadilə proqramları ilə tanış etmək, onların liderlik, şəxsi inkişaf, sosial məsuliyyət, layihələrin idarə olunması və digər sahələr üzrə bilik və bacarıqlarını genişləndirmək idi.

AIESEC Azərbaycan tərəfindən həyata keçirilən Global Volunteer, Global Teacher və Global Talent proqramları barədə ətraflı məlumat verilmiş, bu layihələrin gənclərin xarici ölkələrdə təcrübə qazanmasına və Azərbaycan cəmiyyətinin inkişafına töhfə verməsinə imkan yaratdığı vurğulanmışdır.

Şirkətin Marketinq meneceri Fatimə Novruzova, Satış meneceri Günay Müslümzadə, Layihə koordinatorları Zeynəb Babayeva, Əşrəf Nəzərli, Məhəmməd Kazımzadə, Hünər İsmayılzadə təqdimat zamanı tələbələrə proqramların mahiyyəti, iştirak şərtləri və yaradılan imkanlar barədə ətraflı məlumat vermiş, onları maraqlandıran sualları cavablandırmışlar.