Xəzər Universitetinin Siyasi elmlər və fəlsəfə departamentinin müdiri Dos. Orxan Vəliyev 2025-ci il oktyabrın 20-22-də  Tbilisi Dövlət Universitetinin dəvəti ilə həmin universitetin Sosial və siyasi elmlər fakültəsində ezamiyyətdə olmuşdur. O, Cənubi Qafqazın geosiyasi statusunun dəyişməsində həlledici rol oynamış İkinci Qarabağ müharibəsinin beşinci ildönümü münasibətilə dəvət edilmişdir.

Səfər zamanı Dos. Vəliyev Erasmus proqramı çərçivəsində fakültənin magistratura tələbələri üçün “Azərbaycan milli kimliyi” və “Post-münaqişə dövründə Azərbaycanın xarici siyasəti” mövzularında iki mühazirə oxumuşdur. O, universitetdə yaradılmış Heydər Əliyev auditoriyasında da olmuşdur.

Ezamiyyət çərçivəsində Dos. Orxan Vəliyev universitetin rektoru Prof. Jaba Samuşia və fakültə dekanı Dos. Salome Dundua ilə görüşmüşdür. Bu görüşlərdə universitetlərarası əməkdaşlıq imkanları və Dos. Vəliyevin hazırda üzərində çalışdığı tədqiqat layihəsi çərçivəsində mümkün birgə elmi fəaliyyət istiqamətləri müzakirə olunmuşdur.

Bundan əlavə, dekan Dos. Salome Dundua ilə aparılan danışıqlar nəticəsində “Khazar University Forum 2026” çərçivəsində əməkdaşlığa dair ilkin razılıq əldə edilmişdir.

Hər iki görüşün sonunda Xəzər Universitetinin Direktorlar və Qəyyumlar Şurasının sədri Prof.Akad Hamlet İsaxanlının müəllifi olduğu “Xəzərin sorağında” və “Mənim Qarabağım və ya Qarabağ düyünü” kitabları rektor və dekana hədiyyə edilmiş, görüşlər xatirə şəkillərinin çəkilməsi ilə başa çatmışdır.

Səfər proqramı çərçivəsində Dos. Orxan Vəliyev Tbilisidə Azərbaycan Xalq Cümhuriyyətinin qurucularından Həsən bəy Ağayev və Fətəli xan Xoyskinin, habelə Azərbaycan maarifçiliyinin və modernləşmə tarixinin öncüllərindən Mirzə Fətəli Axundzadə və Mirzə Şəfi Vazehin məzarlarını, eləcə də ulu öndər Heydər Əliyevin abidəsini ziyarət etmişdir. O, Mirzə Fətəli Axundzadə və Nəriman Nərimanov ev muzeylərində də  olmuşdur.