2025-ci il oktyabrın 21-də Xəzər Universitetinin Mərmər zalında gorkəmli dövlət xadimi və alim Həsən Həsənova Xəzər Universitetinin Fəxri doktor diplomunun təqdim olunması mərasimi keçirildi. Tədbirdə universitetin rəhbərliyi və əməkdaşları, qonaqlar iştirak edirdilər.

Universitetin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı çıxış edərək, Xəzər Universitetinin 1991-ci ildə Azərbaycan SSR Nazirlrlər Sovetinin sədi  Həsən Həsənovun sərəncamları ilə  təsis olunmasından minnətdarlıqla söz açdı və ölkədə ilk özəl ali təhsil müəssisəsi olan Xəzər Universitetinin sonrakı inkişaf yollarından danışdı.

Xəzər Universitetinin rektoru Dr. Raziyə İsayeva universitetin hazırda ölkədə və dünya reytinqində malik olduğu üstünlüklər, tədris bazası və təlim, həyata keçirdiyi layihələr, müəllim heyəti və tələbə kollektivi, beynəlxalq əlaqələr və digər mühüm göstəricilər haqqında geniş təqdimatla çıxış etdi.

Azərbaycan Respublikasının Prezidenti yanında Dövlət İdarəetmə Akademiyasının Tarix kafedrasının müdiri, əməkdar müəllim,  Dos. Firdovsiyyə Əhmədova tarix elmləri doktoru Həsən Həsənovun elmi fəaliyyəti haqqında məruzə etdi. Alimin ölkə tarixşünaslığında, xüsusən Azərbaycanın qədim tarixinin öyrənilməsi sahəsində öz istiqamətini yaratdığını, çoxlu kitab və monoqrafiyaların müəllifi olduğunu nəzərə çatdırdı.

Universitetin “Xəzər Xəbər” jurnalının baş redaktor müavini, Əməkdar jurnalist Əlirza Balayev çıxışında 1993-cü olin may ayında Vaşinqtonda Azərbaycan səfirliyinin açılışı və Nyu-Yorkda Türk Günü Yürüşü tədbirlərində Həsən Həsənovla görüşləri haqqında xatirələrini danışdı.

Gorkəmli dövlət xadimi və alim Həsən Həsənova Fəxri doktor diplomunu Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı təqdim etdi. Həsən Həsənov çıxış edərək, elmi fəaliyyətinin yüksək dəyərləndirildiyinə görə minnətdarlığını bildirdi və Xəzər Universitetinə uğurlar arzuladı.

Tədbir universitetin Kamera orkestrinin konserti ilə başa çatdı.