2025-ci il oktyabrın 15-də Macarıstanın Lüdovika Dövlət Xidməti Universitetinin Beynəlxalq əlaqələr üzrə Baş direktoru Liliana Şmex və baş məsləhətçisi David Birodan ibarət nümayəndə heyəti yenicə fəaliyyətə başlamış Lüdovika Türk Araşdırmaları Mərkəzi (Ludovika Center for Turkic Studies) ilə əməkdaşlıq çərçivəsində Xəzər Universitetinin Siyasi elmlər və fəlsəfə departamentində olublar. Qonaqları departament müdiri Dos. Orxan Vəliyev, baş müəllim Baba Bayramlı və assistent Firuzə İsmayılova qarşılayıblar.

Görüş zamanı tərəflər Lüdovika Universiteti, xüsusilə yeni yaradılmış Lüdovika Türk Araşdırmaları Mərkəzi ilə Xəzər Universiteti Siyasi elmlər və fəlsəfə departamenti arasında elmi əməkdaşlıq imkanlarını müzakirə ediblər. Macarıstanın Türk Dövlətləri Təşkilatı (TDT) çərçivəsində iştiraka artan marağı da müzakirə mövzuları arasında olub. Həmçinin, Lüdovika Türk Araşdırmaları Mərkəzinin fəaliyyəti və gələcək planları barədə də ətraflı məlumat verilib.

Görüşün sonunda qonaqlara Xəzər Universiteti Direktorlar və Qəyyumlar Şurasının sədri Prof.Akad. Hamlet İsaxanlının ingilis dilində “Xəzər”in sorağında”, “Mənim Qarabağım və ya Qarabağ düyünü” kitabları hədiyyə edilmişdir. Sonda isə xatirə şəkli çəkdirilmişdir.