2025-ci il oktyabrın 15-də Xəzər Universitetinin Humanitar, təhsil və sosial elmlər fakültəsinin Tarix müəllimliyi ixtisasında təhsil alan I kurs tələbələri AMEA Arxeologiya və Antropologiya İnstitutunun Muzey sərgi zalında ekskursiyada olublar. Səfər Tarix və arxeologiya departamentinin müəllimi Orxan Zamanovun rəhbərliyi ilə təşkil edilib.
Ekskursiyanın məqsədi tələbələrin qədim dövrlərə aid maddi-mədəniyyət nümunələri ilə yaxından tanış olmaları və Azərbaycanın arxeoloji irsi haqqında biliklərini daha da genişləndirmək olub.
Muzeydə tələbələrə Azərbaycan ərazisində aparılmış arxeoloji qazıntılar zamanı tapılmış saxsı qablar, küplər, məişət əşyaları və müxtəlif qədim dövr artefaktları barədə ətraflı məlumat verilib. Hər bir eksponatın tarixçəsi və mənsub olduğu dövr haqqında maraqlı faktlar səsləndirilib. Tələbələr muzeyin müxtəlif bölmələrini gəzərək, Azərbaycanın qədim yaşayış məskənləri, dövlətçilik tarixi və mədəni inkişaf mərhələləri ilə bağlı eksponatları diqqətlə izləyiblər. Qədim saxsı nümunələri və küplər üzərində aparılan izahlar onlarda arxeologiyaya olan marağı daha da artırıb.