2025-ci il oktyabrın 9-12-də Təbriz Universitetinin (İran İslam Respublikası) rektoru, Prof. Məhəmmədtəqi Əlaminin başçılığı ilə nümayəndə heyəti Xəzər Universitetində rəsmi səfərdə olub. Səfərin məqsədi iki universitet arasında elmi, tədris və tədqiqat əməkdaşlığının genişləndirilməsi, yeni tərəfdaşlıq istiqamətlərinin müəyyənləşdirilməsi, həmçinin birgə elmi tədqiqat layihələrinin təşviqi olmuşdur.

Tədbirin açılışında Xəzər Universiteti Kamera Orkestrinin çıxışı təqdim olunub.

Xəzər Universitetinin təsisçisi, Direktorlar və Qəyyumlar Şurasının sədri Porf.Akad. Hamlet İsaxanlı qonaqları salamlayaraq, ali təhsil müəssisələri arasında əlaqələrin genişlənməsinin vacibliyini qeyd edib.

Təbriz Universitetinin rektoru, Prof. Məhəmmədtəqi Əlami çıxışında iki universitet arasında strateji əməkdaşlıq potensialına diqqət çəkib və birgə layihələrin regionun elmi inkişafına töhfə verəcəyini bildirib.

Xəzər Universitetinin rektoru Dr. Raziyə İsayeva Xəzər Universiteti haqqında məruzə ilə çıxış edərək, universitetin beynəlxalq fəaliyyəti, elmi-tədqiqat infrastrukturu, tələbə mübadilə proqramları, potensialı və s. barədə geniş məlumat vermişdir.

Təbriz Universitetinin elmi işlər üzrə prorektoru, Prof. Əsgər Əsgəri öz çıxışında, birgə PhD proqramlarının təşkili, ikili diplom proqramlarının yaradılması, birgə tədqiqatların  həyata keçirilməsi və birgə tədqiqat institutlarının yaradılması kimi əməkdaşlıq istiqamətlərinə toxunmuşdur.

Xəzər Universiteti Biomateriallar Tədqiqat Mərkəzinin direktoru, Prof. Sudabə Davaran isə “Xəzər Universiteti və Təbriz Universiteti arasında potensial əməkdaşlıq imkanları” mövzusunda təqdimatla çıxış edib.

Görüşün sonunda Xəzər Universiteti və Təbriz Universiteti arasında elmi və akademik əməkdaşlıq üzrə Anlaşma Memorandumu imzalanıb. Sənəd iki ali təhsil müəssisəsi arasında tədqiqat əməkdaşlığını, tələbə və müəllim mübadiləsini, birgə elmi nəşrləri və innovativ layihələrin həyata keçirilməsini nəzərdə tutur.

Səfər çərçivəsində qonaqlar, həmçinin, Bakı şəhərinin tarixi və mədəni abidələri ilə tanış olub, rəsmi ziyafətdə iştirak ediblər.