2025-ci il oktyabrın 10-da Xəzər Universitetində Karyera və Məzunlar Mərkəzinin təşkilatçılığı ilə Azad Mirzəcanzadə İnkişaf Proqramının əməkdaşları tərəfindən tələbə və məzunlar üçün məlumat sessiyası keçirilib.

Tədbiri universitetin Karyera və Məzunlar Mərkəzinin direktoru Zərifə Əliyeva açaraq, belə təşəbbüslərin tələbələrin şəxsi və peşəkar inkişafında mühüm rol oynadığını vurğulayıb. Qeyd edib ki, “Azad Mirzəcanzadə İnkişaf Proqramı” kimi layihələr gənclərə yalnız nəzəri bilik deyil, həm də real təcrübə qazanmaq, yeni ideyalarını reallaşdırmaq üçün geniş imkanlar yaradır.

Proqramın layihə meneceri İradə Zeynalova çıxış edərək, iştirakçılara proqramın məqsədləri, müraciət prosesi, təlim və mentorluq mərhələləri, eləcə də layihə ideyalarına maliyyə dəstəyi mexanizmləri barədə ətraflı məlumat verib. O, əlavə edib ki, proqram gənclərin öz potensiallarını üzə çıxarmasına, innovativ düşüncə və sosial məsuliyyət bacarıqlarını inkişaf etdirməsinə xidmət edir.

Proqramın ilk qaliblərindən olan Kənan Arifli proqramda iştirak təcrübəsini bölüşərək, layihənin onun fərdi və peşəkar inkişafına göstərdiyi təsirdən danışıb. Kənan Arifli vurğulayıb ki, “Azad Mirzəcanzadə İnkişaf Proqramı” gənclərə məqsədyönlü düşünmək, komanda işi bacarıqlarını inkişaf etdirmək və yeni ideyalarını gerçəkləşdirmək üçün mühüm platforma yaradır.

Görüş səmərəli fikir mübadiləsi ilə yekunlaşıb və iştirakçılarda şəxsi və peşəkar inkişaf istiqamətində marağın artmasına töhfə verib.