2025-ci il oktyabrın 8-də Xəzər Universitetinin Mərmər zalında universitetin şəhidi Ataməli Musaoğlunun anası Leyla Musayevanın fərdi  sərgisi nümayiş etdirildi. Sərgi təkcə sənət nümayişi deyil, həm də bir ana ürəyinin, bir qəhrəman övladın və bir ailənin həyat hekayəsi idi.

Ataməli Musaoğlu 2019-cu ildə Xəzər Universitetinin magistraturasına klinik psixologiya ixtisası üzrə qəbul olunmuşdu. O, elmə bağlı bir tələbə idi. 2020-ci il sentyabrın 27-də Azərbaycan xalqının Vətən müharibəsi başladığı zaman Ataməli magistraturanın ikinci kurs tələbəsi olsa da, tərəddüd etmədən könüllü şəkildə cəbhəyə yollandı. Ataməli Musaoğlu Azərbaycan Silahlı Qüvvələrində baş kəşfiyyatçı kimi xidmət edib və 2020-ci il oktyabrın 16-da Ağdərənin azadlığı uğrunda gedən ağır döyüşlərdə qəhrəmancasına şəhid olub. Ataməlinin adı Xəzər Universitetinin yaddaşında igidlik, mərdlik və vətən sevgisinin rəmzi kimi yaşayır.

 Leyla Musayeva oğul itkisini ürəyində daşısa da, sənəti və yaradıcılığı həyat dayağına çevirməyi bacarıb. O,  dəniz sahillərindən topladığı driftwood – yəni su və küləyin illər ərzində formalaşdırdığı ağac parçalarını sənət əsərinə çevirir. Bu əsərlərdə həm təbiətin gözəlliyi, həm də bir ananın qəlbindəki güc, səbr və ümid hiss olunur.

   Tədbirdə Xəzər Universitetinin rektoru Dr. Raziyə İsayeva, sərginin müəllifi Leyla Musayeva və UNEC-in nəzdində Sosial-İqtisadi Kollecin direktor müavini Zaur Vəliyev çıxış etdilər.

Sonda Xəzər Universitetinin rektoru Dr. Raziyə İsayeva şəhidin anasına və ailə üzvlərinə gül dəstələri və hədiyyə təqdim etdi.