2025-ci il oktyabrın 8-də Xəzər Universitetinin Tarix və arxeologiya departamentinin müəllimi Orxan Zamanovun təşəbbüsü ilə HTSE fakültəsinin tarix müəllimliyi ixtisası üzrə “Arxeologiya və etnoqrafiyanın əsasları” fənnindən arxeoloji metodologiyaya həsr olunmuş tədris seminarı təşkil olunub. Seminarın qonağı Azərbaycan Milli Elmlər Akademiyası Arxeologiya və Antropologiya İnstitutunun şöbə müdiri, tarixçi-rəssam Vəfa Həsənova olmuşdur.

Seminar çərçivəsində tələbələrə arxeoloji tədqiqat prosesinin əsas mərhələləri – abidələrin topoqrafiyası, qazıntıların stratiqrafiyası və tapıntıların təsvirinin hazırlanması texnikası barədə ətraflı məlumat verilib. Mütəxəssisin təqdimatı əsasında tələbələr əyani vəsaitlərdən istifadə edərək, gil qabların təsvirlərini çəkməklə praktik bacarıqlarını sınayıblar.

Əyani təcrübə gənc tarixçilərin arxeologiya elmini daha düzgün mənimsəmələri və praktik vərdişlərinin formalaşdırılması, eləcə də tətbiqi arxeologiya sahəsində biliklərinin artırılması məqsədi ilə təşkil olunmuşdur.

İnteraktiv şəkildə keçirilən dərs tələbələrin böyük marağına səbəb olub və fənnin metodoloji səviyyəsini daha da yüksəldib.