2025-ci il oktyabrın 1- də Xəzər Universitetində yeni qəbul olunmuş beynəlxalq tələbələr üçün Mərmər zalda Oriyentasiya Günü təşkil olunmuşdur.

Günün açılış hissəsi Azərbaycan Respublikasının Dövlət Himni ilə başlayıb,  sonra universitetin rektoru Dr. Raziyə İsaevanın nitqi ilə davam etmişdir.

Tədbir boyunca informasiya sessiyaları keçirilmiş və bu zaman fakültə nümayəndələri öz fakültələri haqqında məlumat vermişlər. Beynəlxalq əlaqələr şöbəsinin əməkdaşları – Jalə Məmmədova universitetin beynəlxalq xidmətləri və ümumi məlumatlar, İlqarə Abdullayeva miqrasiya və yaşayış icazəsi ilə bağlı vacib məsələlər, Seyran Əliyeva isə Erasmus+ proqramı barədə ətraflı çıxış etmişlər. Eyni zamanda, tələbə klubları və ESN Khazar da öz fəaliyyətləri haqqında məlumat verərək, yeni tələbələri üzvlüyə dəvət etmişlər.

Sonra tələbələr üçün çay fasiləsi təşkil olunmuş, iştirakçılar çay, qəhvə, şirniyyat və meyvə şirələrindən dadaraq, bir-birləri ilə tanış olmuşlar.

Fasilədən sonra tələbələr arasında tanışlığı artırmaq məqsədilə  oyunlar keçirilmişdir. Tələbələr şəbəkələşmə sessiyası çərçivəsində bir-birləri, tələbə klublarının üzvləri və Beynəlxalq əlaqələr şöbəsinin əməkdaşları ilə yaxından tanış olmuşlar.

Tədbirin yekun hissəsində müxtəlif xalqların musiqiləri səslənmiş, tələbələr rəqs edərək, xoş vaxt keçirmişlər.

Oriyentasiya Gününün sonunda bütün iştirakçılara Xəzər Universitetinin hədiyyə dəstləri təqdim olunmuş, onlara uğurlu təhsil və yaddaqalan tələbəlik illəri arzu edilmişdir.