2025-ci il oktyabrın 7-də Xəzər Universitetinin Elmi Şurasının növbəti iclası keçirildi.

İclasa universitetin rektoru Dr. Raziyə İsayeva sədrlik edərək, gündəlikdə yer alan məsələləri Şura üzvlərinin diqqətinə çatdırdı. İlk olaraq sədr Elmi Şuranın yeni tərkibi barədə məlumat verdi. Qeyd etdi ki, sənaye sahəsində çalışan 5 mütəxəssis də daxil olmaqla, Elmi Şuranın ümumilikdə 41 üzvü təsdiq olunmuşdur.

İclasın gündəliyində yer alan birinci məsələ - məzunlar haqqında məlumat təqdim olundu. Təbiət Elmləri və mühəndislik fakültəsinin dekanı Fəxrəndə Əfəndiyeva, İqtisadiyyat və menecment fakültəsinin dekan vəzifəsini icra edən Xanım Öməroğlu, Humanitar, təhsil və sosial elmlər fakültəsinin dekan müavini Sevinc Allahverdiyeva, Baytarlıq təbabəti fakültəsinin dekan vəzifəsini icra edən Çiçək Əliyeva, İqtisadiyyat və biznes yüksək təhsil fakültəsinin dekanı İnqilab Əhmədov tələbələrin akademik göstəricilərini, ixtisas istiqamətlərini və müvafiq statistik məlumatları nəzərə çatdırdılar. Təqdim edilən məzun siyahısı Elmi Şura üzvləri tərəfindən təsdiq olundu.

Gündəliyin ikinci məsələsi fəlsəfə doktoru proqramı üzrə doktoranturaya qəbul olunmuş tələbələrin təhsil formalarının əyanidən qiyabiyə keçirilməsi ilə bağlı idi. Elmi Şuranın katibi Günel Bahəddinova bildirdi ki, cari akademik ildə Xəzər Universitetinə 12 nəfər yerli doktorant qəbul olmuşdur. Onlardan 2 nəfəri qiyabi, 10 nəfəri isə əyani formada təhsil alır. Əyani formada təhsil alan doktorantlardan 5 nəfəri rəsmi ərizə ilə müraciət edərək, təhsil formalarının əyanidən qiyabiyə dəyişdirilməsini xahiş etmişlər. Elmi Şura üzvləri tərəfindən müraciətlər müsbət qiymətləndirildi və müvafiq qərar qəbul edildi.

Gündəliyin üçüncü məsələsi olan Elmi Şuranın illik fəaliyyət planı müzakirə edildi. Sədr Dr. Raziyə İsayeva fəaliyyət planında yer alan məsələlər barədə məlumat verərək, onları Şura üzvlərinin diqqətinə çatdırdı. Üzvlər tərəfindən irəli sürülən təkliflər nəzərə alınaraq, plan təsdiq edildi.

İclasın sonunda cari məsələlər müzakirə olundu və iclas  başa çatdı.