2025-ci il sentyabrın 28-də Pakistanın İslamabad Universitetinin Fars dili və ədəbiyyatı fakültəsinin professoru Əli Kumeyl Qazalbaş Xəzər Universitetinin nəzdində fəaliyyət göstərən Mövlana Ədəbi-Fəlsəfi Araşdırmalar İnstitutunun (MƏFAİ) qonağı olmuşdur. Əli Kumeyl daha öncə Xəzər Universitetinin təşkil etdiyi konfranslarda məruzəçi qismində iştirak etmişdir.

Professoru institutun elmi işçisi Dr. Fəridə Seyidova və institutun Məşvərət şurasının üzvlərindən Dos. Əsmətxanım Məmmədova qarşılamış və birgə əməkdaşlıqla bağlı müzakirələr aparmışlar.

Pakistanlı professor dünya mistik düşüncəsinin inkişafında önəmli rolu olan mütəfəkkir, “Pakistanın ideoloji atası”, sufi görüşləri ilə Qərbdə məşhurlaşmış şair və ictimai xadim Məhəmməd İqbal ilə əlaqədar araşdırmalarından bəhs etmiş, Mövlana İnstitutunun cari tədqiqləri ilə maraqlanmışdır. Sonda professorla xatirə şəkli çəkdirilmiş və ona institutun nəşrlərindən hədiyyə edilmişdir.