"Abituriyentlər bu ilki ixtisas seçimləri zamanı yenə də əvvəlki illərdə olduğu kimi, özəl universitetlər arasında Xəzər Universitetinə daha çox üstünlük verirdilər. Amma bu il bunun daha da qabarıq şahidi olduq".
Bu sözləri AzEdu.az-a açıqlamasında Sosial Tədqiqatlar Mərkəzinin (STM) əməkdaşı, təhsil məsələləri üzrə tədqiqatçı Elmin Nuri deyib. Sözünə davam edən ekspert qeyd edib ki, "abituriyentlər  artıq bilirdilər ki, məsələn, tədrisi ingilis dilində olan ixtisaslar harada daha keyfiyyətli şəkildə tədris olunur. Həmçinin, hansı özəl universitetdə hansı müsbət və mənfi cəhətlərin olduğunu da çox yaxşı anlayırdılar. Bəzən təhsil mütəxəssisləri qədər. Təbii ki, biz də bu prosesdə onlara məsləhətlərimizi verirdik.
Siyahının başında isə yenə Xəzər Universiteti dayanırdı. Hətta Xəzər Universitetində illik təhsil haqlarının digər özəl universitetlərə nisbətən daha yüksək olması belə bir çox abituriyenti fikrindən döndərmirdi.Valideynlər deyirdilər ki, "eybi yox, artıq pul verərəm, amma övladım “Xəzər”də oxusun". Ekspert əlavə edib ki, “mənim niyyətim hansısa özəl universiteti reklam etmək deyil, lakin reallıq budur və bu faktı gizlətmək olmaz. İxtisas seçimi ilə məşğul olan hər kəslə danışsanız, eyni sözləri eşidəcəksiniz.
Tədqiqatçı xususilə vurğulayıb ki, “siyahının növbəti pillələrində Azərbaycan Universiteti və Qərbi Kaspi Universiteti gəlir. Bilirik ki, ölkədə 9 özəl ali təhsil müəssisəsi var. Çox təəssüf ki, digər özəl universitetlər adətən yalnız məcburiyyətdən, toplanan bala uyğun yer tapmaq məqsədilə seçilir".

https://tehsilmedia.az/index.php?newsid=14813