2025-ci il iyulun 4-də Xəzər Universitetinin Elmi Şurasının növbəti iclası keçirilmişdir. İclasa universitetin rektor vəzifəsini icra edən professor Məhəmməd Nuriyev sədrlik etmiş və gündəlikdə yer alan məsələləri Şura üzvlərinin diqqətinə çatdırmışdır.

İclasın əvvəlində təşkilati məsələlər müzakirəyə çıxarılmışdır. Bildirilmişdir ki, 01 iyul 2025-ci il tarixindən etibarən Xəzər Universitetində bir sıra yeni təyinatlar həyata keçirilmişdir. Humanitar, təhsil və sosial elmlər fakültəsinə filologiya üzrə fəlsəfə doktoru Milana Abbasova dekan təyin olunmuşdur. Eyni zamanda, universitetin tərkibində yeni Hasvet baytarlıq təbabəti fakültəsi yaradılmış  və Çiçək Əliyeva dekan vəzifəsini icra edən şəxs kimi təyin edilmişdir. Elmi Şura üzvləri hər iki əməkdaşı təbrik etmiş və onlara gələcək fəaliyyətlərində uğurlar arzulamışdır.

Sonra iclasın gündəliyində yer alan digər məsələlərin müzakirəsinə keçilmişdir. Gündəliyin ikinci məsələsi çərçivəsində universitetin məzun olmuş bakalavriatura və magistratura üzrə tələbələri barədə məlumatlar təqdim olunmuşdur. Tələbələrin akademik göstəriciləri, ixtisasları və müvafiq statistik göstəriciləri haqqında məlumatları Təbiət elmləri və mühəndislik fakültəsinin dekanı Fəxrəndə Əfəndiyeva, İqtisadiyyat və menecment fakültəsinin dekanı Raziyə İsayeva, Humanitar, təhsil və sosial elmlər fakültəsinin dekanı Milana Abbasova, Təbiət elmləri, sənət və texnologiya yüksək təhsil fakültəsinin dekanı Günel Bahəddinova və İqtisadiyyat və biznes yüksək təhsil fakültəsinin dekanı İnqilab Əhmədov təqdim etmişdir. Məzunların siyahısı Elmi Şura üzvləri tərəfindən təsdiq olunub.

Gündəliyin üçüncü məsələsi fəlsəfə doktorluğu proqramı üzrə qəbul imtahanlarının proqramlarının təsdiqinə həsr olunmuşdur. Bu barədə Elmi Şuranın katibi Günel Bahəddinova məlumat vermişdir. Bildirilmişdir ki, 2025-ci il üzrə fəlsəfə doktorluğu səviyyəsində 10 ixtisas üzrə qəbul imtahanları üçün proqramlar hazırlanmışdır.

Qeyd olunmuşdur ki, hər bir proqram üzrə daxili və xarici ekspert rəyləri əldə edilmişdir. Proqramlarla tanış olan Elmi Şura üzvləri müvafiq qərarla onları təsdiqləmişdir.

İclasın sonunda cari məsələlər – məzunluq tədbirinin təşkili, 2025/2026-cı tədris ili üçün dərs yükünün bölüşdürülməsi və digər təşkilati məsələlər müzakirə olunmuşdur.