2025-ci il iyulun 2-də Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti və AMEA Arxeologiya və Antropologiya İnstitutunun təşəbbüsü, Ağstafa Rayon İcra Hakimiyyətinin dəstəyi ilə “Keşikçidağ” Dövlət Tarix-Mədəniyyət Qoruğu tərəfindən Qazax Müəllimlər Seminariyasının ADA Universitetinin Qazax Mərkəzində “Ağstafa-Qazax bölgəsinin arxeoloji irsi yeni tədqiqatlar işığında” mövzusunda elmi-praktik seminar keçirilmişdir.

Seminarda AMEA Arxeologiya və Antropologiya İnstitutunun aparıcı elmi işçisi, Xəzər Universitetinin Tarix və arxeologiya departamentinin müəllimi Dr. Yaqub Məmmədov “2016-2023 - cü illərdə Damcılı mağarasında aparılmış Azərbaycan - Yaponiya birgə beynəlxalq arxeoloji tədqiqatların nəticələri” mövzusunda məruzə  edib.

Seminarda "Keşikçidağ" Dövlət Tarix-Mədəniyyət Qoruğu tərəfindən Ağstafa rayonu ümumtəhsil müəssisələrinin şagirdləri arasında keçirilən "Keşikçidağda tarixin izləri" adlı esse müsabiqəsinin qalibləri mükafatlandırılıb.

Seminar başa çatdıqdan sonra qonaqların iştirakı ilə “Keşikçidağda elmi arxeoloji qazıntılar və Yay məktəbi-5” adlı layihənin həyata keçirildiyi “Yovşanlıdərə” kurqanlarına elmi tur təşkil olunmuşdur. Ekspedisiyanın rəhbəri tərəfindən arxeoloji qazıntıların aparıldığı ərazi və burada aşkarlanmış zəngin artefaktlar haqqında geniş məlumat verilmişdir.