2025-ci il mayın 26-da Xəzər Universitetinin Bakıxanov filialının akt zalında Həyat elmləri departamentinin müəllimi Gülafət Şəfiyeva tərəfindən “Tələbələrdə əhval-ruhiyyə dəyişikliklərinin psixoloji səbəbləri” mövzusunda seminar təşkil olunmuşdur.

Seminar zamanı Gülafət Şəfiyeva öz dissertasiya işi çərçivəsində universitetin tələbələri arasında keçirdiyi beynəlxalq DASS-21 sorğusunun nəticələri ilə bağlı ətraflı məlumat vermişdir. Nəticələrə əsasən, tələbələr arasında əhval-ruhiyyə dəyişikliklərinin əsas psixoloji səbəbləri kimi təşviş, stress və depressiya halları ön plana çıxmışdır.

Xüsusilə imtahan sessiyası ərəfəsində tələbələrdə müşahidə olunan təşviş və stressin səbəbləri izah edilmiş, bu halların qarşısının alınması yolları ətraflı izah olunmuşdur. Seminar iştirakçılarına xətalı və təhrif edilmiş düşüncələrin necə tanınıb düzgün təhlil ediləcəyi, bu kimi düşüncələrin motivasiyaya mənfi təsirinin necə azaldıla biləcəyi haqqında praktik məsləhətlər verilmişdir.

Seminarın sonunda iştirakçılarla birlikdə meditasiya seansı keçirilmiş və bu metodun stress və təşvişi azaltmada effektivliyi vurğulanmışdır.