2025-ci il mayın 15-də Xəzər Universitetində Hüquq departamentinin təşkilatçılığı ilə birinci kurs tələbələri üçün“Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”  çərçivəsində "Təhsildə insan hüquqları" mövzusunda  seminar keçirildi. Seminarın məruzəçisi Hüquq departamentinin müdiri, hüquq üzrə fəlsəfə doktoru, Dos. Cabir Xəlilov idi.

"Təhsildə insan hüquqları" mövzusuna həsr olunan seminarın əsas məqsədi tələbələrə təhsil hüququnun insan hüquqları sistemindəki rolu və əhəmiyyəti haqqında ilkin biliklərin aşılanması olmuşdur. Tədbirdə beynəlxalq və milli hüquqi normalar, dövlətin təhsilin əlçatanlığı və keyfiyyətinin təminində rolu, eləcə də bu sahədə mövcud olan problemlər və çağırışlar müzakirə edilmişdir.

İnteraktiv və fəal mühitdə keçən seminarda tələbələr mövzuya böyük maraq göstərmiş, insan hüquqları ilə bağlı ümumi anlayışlarla yanaşı, gündəlik tələbə həyatı ilə bağlı konkret situasiyalar barədə də çoxsaylı suallar vermişlər. Müzakirələr zamanı ödənişsiz təhsil hüququ, təhsil müəssisələrində ayrı-seçkiliyin qarşısının alınması, tələbələrin tədris prosesində iştirak hüququ kimi məsələlərə toxunulmuşdur.

Seminarın sonunda iştirakçılar mövzu üzrə əldə etdikləri biliklərə görə təşəkkür etmiş və gələcəkdə bu kimi tədbirlərin davam etdirilməsini arzuladıqlarını bildirmişlər.