Elm və Ali Təhsil üzrə Dövlət Agentliyi (EATDA) SABAH qruplarının İcra Komitəsi və Türkiyənin Ufuk Planlama şirkətinin təşkilatçılığı ilə 2025-ci il 30 may-3 iyun tarixində Xəzər Universitetində “Bir Başqa Təhsil, Bir Başqa Şəhər” layihəsi çərçivəsində “Dayanıqlı şəhər layihəsi” üzrə Multidisiplinar məkan planlaşdırma təlimi keçirilmişdir.

Təlimin əsas məqsədi şəhərlərin dayanıqlı inkişafı, müasir planlaşdırma metodlarının öyrənilməsi və tələbələrin praktiki bilik və bacarıqlarının artırılmasıdır.

Layihədə Azərbaycan Memarlıq və İnşaat Universitetinin (AzMİU) SABAH qrupları, Xəzər Universiteti, Orta Doğu Texniki Universiteti (ODTÜ), Yıldız Texniki Universiteti (YTU), Ankara Universiteti, İstanbul Universiteti və Türkiyənin digər nüfuzlu ali təhsil müəssisələrinin tələbələri iştirak ediblər.

Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı açılış nitqi söyləmişdir.  Nizami Rayon İcra Hakimiyyəti başçısının birinci müavini  Konul Həsənova, Ufuk Planlama şirkətinin təsisçisi və Ankara Universitetinin Landşaft memarlığı departamentinin müəllimi     Dr. Necla Kılınç, AzMİU Beynəlxalq əlaqələr üzrə prorektoru Prof. Nərgiz Abdullayeva, Elm və Ali Təhsil üzrə Dövlət Agentliyinin Ali təhsil müəssisələri ilə iş sektorunun müdiri, SABAH qruplarının İcra Komitəsinin rəhbəri Dos. Elza Səmədova  çıxış etmişlər. 

Xəzər Universitetindən Memarlıq və dizayn  ixtisasları üzrə IV kurs tələbələri Cəmilə Səfərova, Nuray Hüseynli, Günay Qədirli, III kurs tələbələri Aydan Səfərova, İlahə Həsənli, Heydər Xudaverdiyev, Fidan Mustafayeva, Röya Həmidova və Memarlıq ixtisası üzrə I kurs tələbələri Cəfər Əliyev, Mehin Qəhrəmanzadə, Selcan Ərəbxanlı təlimlərdə iştirak etmişlər.

Təlimlərin məhsuldarlığını artırmaq məqsədilə təlimçi və mütəxəssislərin çıxışları mütəmadi şəkildə davam etdirilmişdir. Türkiyənin Ufuk Planlama şirkətindən Dr. Necla Kılınç, Prof. Dr.Halim Perçin, Kübra Ergül, Hakan Mutlu və Muzaffer Topak, eləcə də Xəzər Universitetinin Memarlıq və dizayn departamentinin müəllimləri – İlahə Təhməzli, Sevinc Həsənova, Dos. Xəzər Zeynalov, SABAH qruplarının müəllimləri – Prof. Yeganə Hacıyeva və Teymur İsazadə müxtəlif mövzularda məruzə etmişlər.

Eyni zamanda, Xəzər Universitetinin Memarlıq və dizayn departamentinin müəllimləri – Dos. Şəhla Abbasova, Sevinc Həsənova, İlahə Təhməzli və Günay Məmmədova studiya işləri zamanı tələbələrə layihə üzrə metodiki məsləhətlər vermiş və onları təlim müddətində yaxından dəstəkləmişlər.

Təlim çərçivəsində ümumilikdə 5 layihə hazırlanaraq, təqdim olunmuşdur. Təlimdə iştirak edən müəllim və tələbə heyətinə sertifikatlar təqdim edilmişdir.

Qeyd edək ki, bu əhəmiyyətli təşəbbüs AzMİU-nun 50 illik yubileyinə həsr olunmuşdur və layihə dövlət və özəl sektorlar arasında əməkdaşlıq çərçivəsində həyata keçirilir. Bu cür beynəlxalq və multidisiplinar əməkdaşlıq gənc mütəxəssislərə şəhərsalma və davamlı inkişaf sahəsində geniş perspektivlər qazandırır.