2025-ci il iyunun 2-də Həyat elmləri departamentinin müdiri Dr. Cəmalə Eldarovanın dəvəti ilə 1 İyun – Uşaqların Beynəlxalq Müdafiəsi Günü münasibətilə “Dünya” məktəbinin rus bölməsinin 3A sinif şagirdləri Xəzər Universitetində oldular. Tədbirdə Həyat elmləri departamentinin dosenti Dr. Cavid Ocaqi, departamentin müəllimi Gülafət Şəfiyeva, həmçinin 3A sinif şagirdləri ilə yanaşı, “Dünya” məktəbinin rus bölməsinin tədris işləri üzrə direktor müavini İlahə Hüseynova, sinif rəhbəri Lamiyə Hüseynova və köməkçi müəllim Mədinə Babayeva iştirak edirdilər. Bu səfər şagirdlər üçün həm maarifləndirici, həm də yaddaqalan bir təcrübə oldu.

Səfər çərçivəsində şagirdlər ilk olaraq Xəzər Universitetinin təsisçisi, Direktorlar və Qəyyumlar Şurasının sədri,  Prof.Akad Hamlet İsaxanlı ilə görüşdülər. Şagirdlər ona Xəzər Universitetinin və “Dünya” məktəbinin yaranma tarixi, təhsil prinsipləri və gələcək imkanları ilə bağlı maraqlı suallar ünvanladılar. Hamlet İsaxanlı  sualları böyük məmnuniyyətlə cavablandırdı və səmimi dialoq şəraitində şagirdlərin təhsili ilə maraqlanaraq, onlara dəyərli tövsiyələr verdi.

Eyni zamanda, şagirdlər öz əl işlərini Hamlet İsaxanlıya təqdim etdilər, şeirlər səsləndirdilər və mahnılar ifa etdilər. Onların hazırladığı  bədii çıxışlar tədbirə xüsusi bir bayram ab-havası qatdı.

Proqramın davamında Həyat elmləri departamentinin dosenti Dr. Gülbəniz Qasımova Universitetin laboratoriyasında şagirdlərə müxtəlif bioloji nümunələr haqqında əyani məlumatlar verdi. Şagirdlər çömçəquyruq və su ilanı kimi canlılarla tanış olaraq, müşahidə bacarıqlarını inkişaf etdirmək imkanı qazandılar.

Həmçinin, müəllimlər şagirdlərə canlıların ətraf mühitdəki rolunu izah edərək, biomüxtəlifliyin qorunmasının vacibliyini vurğuladılar. Onlara heyvanlardan qorxmamaq, onları öldürməmək və təbiətə hörmətlə yanaşmağın əhəmiyyəti barədə tövsiyələr verdilər.

Tədbir, xüsusilə görkəmli polimat alim  Hamlet İsaxanlı ilə görüş, ali təhsil mühiti ilə tanışlıq şagirdlər üçün  mənəvi zənginlik baxımından unudulmaz bir bayram hədiyyəsi oldu.

Sonda xatirə şəkili çəkildi.