2025-ci il iyunun 3-də Karyera və Məzunlar Mərkəzinin təşkilatçılığı ilə Xəzər Universitetinin İqtisadiyyat və menecment fakültəsinin əməkdaşları, Turizm ixtisası üzrə təhsil alan III və IV kurs tələbələri, eləcə də Karyera və Məzunlar Mərkəzinin nümayəndələri Lunchef katerinq şirkətində sahə gəzintisində oldular. Tədbirin əsas məqsədi tələbələrin nəzəri biliklərini praktik mühitdə müşahidə etmələri, əmək bazarındakı aktual tələblərlə tanış olmaları və potensial karyera imkanlarını öyrənmələri idi.

Sahə gəzintisi zamanı iştirakçılar şirkətin fəaliyyəti ilə yaxından tanış oldular. Lunchef-in insan resursları və əməliyyatlar üzrə menecerləri tələbələrə şirkətin yaranma tarixi, missiyası, gündəlik iş prinsipləri, xidmət sahələri və müştəri portfeli haqqında ətraflı məlumat verdilər. Qeyd olundu ki, Lunchef Azərbaycanda korporativ katerinq xidmətləri sahəsində innovativ yanaşmaları ilə seçilən şirkətlərdən biridir. Şirkət müasir texnologiyalar, qida təhlükəsizliyi standartları və peşəkar komanda əsasında fəaliyyət göstərir.

Gəzinti zamanı şirkət nümayəndələri tələbələrin ünvanladığı sualları cavablandıraraq, bu sahədə karyera qurmağın real imkanlarından və çətinliklərindən də bəhs etdilər. Həmçinin, iki qurum arasındakı əməkdaşlıq çərçivəsində tələbələrin istehsalat təcrübəsi, birgə layihələrin, tədbirlərin həyata keçirilməsi məsələləri də geniş müzakirə olundu.

Tədbirin sonunda şirkətdə işləməkdə maraqlı olan bir sıra tələbələrlə ilkin müsahibələr keçirildi.  Bu təşəbbüs tələbələr üçün real iş mühitinə inteqrasiya baxımından əhəmiyyətli  oldu.