2025-ci il mayın  26-da Xəzər Universitetində Beynəlxalq əlaqələr şöbəsinin təşkilatçılığı və əcnəbi tələbələrin iştirakı ilə Ümumdünya mədəni müxtəliflik günü  qeyd olunub. Tədbirdə müxtəlif ölkələrin Azərbaycandakı səfirliklərindən nümayəndələr də iştirak edib.

Xatırladaq ki, Dialoq və inkişaf naminə Ümumdünya mədəni müxtəliflik günü UNESKO-nun  2001-ci ildə qəbul etdiyi Mədəni müxtəlifliyə dair bəyannaməsinə əsasən 2003-cü ildən başlayaraq, hər il  mayın 21-də qeyd olunur. 

 Məlumat üçün  bildirək  ki, Xəzər Universiteti bu günədək dünyanın 60-dan çox ölkəsindən  olan əcnəbi tələbələrinə ev sahibliyi edir.

Xəzər Universiteti Beynəlxalq əlaqələr şöbəsinin müdiri Fatimə Vəliyeva tədbiri  açaraq,  iştirakçılara uğurlar arzulayıb.

Müxtəlif ölkələrdən olan  tələbələr öz musiqi, rəqs, sərgi və mətbəxləri vasitəsilə ölkələrinin mədəniyyətini təqdim ediblər.

 Tədbirin əsas hissələrindən biri milli geyim təqdimatı olub. Azərbaycan, Əfqanıstan, Çin, Efiopiya, İran, İordaniya, Qazaxıstan, Fələstin, Pakistan, Sudan, Şri Lanka və Türkiyədən olan tələbələr öz ölkələrinin bayraqları ilə səhnəyə çıxaraq, milli geyimlərini nümayiş etdiriblər. Sonra Azərbaycanın “Xarıbülbül”, Pakistanın “Zindabad” və “Dil Dil Pakistan” adlı musiqi  rəqs müşayiəti ilə ifa olunub. Hər bir ölkə öz mədəniyyətini stendlər vasitəsilə əks etdirib.

Xına və üz boyama kimi  fəaliyyətlər iştirakçıların marağına səbəb olub. Tələbələrin iştirak etdiyi yallı fləşmobu, ESN (Erasmus Tələbələr Şəbəkəsi) təqdimatı və qısa müsabiqə təşkil edilib. Qaliblərə  hədiyyələr verilib.