2025-ci il mayın 29-da Xəzər Universitetinin Nizami korpusunda Humanitar, təhsil və sosial elmlər fakültəsinin, Tarix və arxeologiya departamentinin və AMEA Arxeologiya və Antropologiya İnstitutunun “Elmi ekspozisiyanın təşkili” şöbəsinin ortaq təşkilatçılığı və Xəzər Universitetinin İctimai Əlaqələr və Media Qurumunun dəstəyi ilə “Antik dövrdə Qərb və Şərq sivilizasiyaları: əlaqələr, təsirlər və baxışlar” adlı elmi-tədris seminarı təşkil olunmuşdur.

 Seminarda AMEA Arxeologiya və Antropologiya İnstitutunun Elmi İşlər üzrə direktor müavini, tarix elmləri doktoru Zaur Həsənov və Xəzər Universitetinin Tarix və arxeologiya departamentinin müəllimi, Dr. Rüxsarə Quliyeva çıxış etmişlər.

 Humanitar, təhsil və sosial elmlər fakültəsinin Tarix və arxeologiya departamentinin müəllimi, AMEA Arxeologiya və Antropologiya İnstitutunun “Elmi ekspozisiyanın təşkili” şöbəsinin müdiri vəzifəsini icra edən Orxan Zamanovun moderatorluğu ilə mütəxəssislərin qədim sivilizasiyalar ilə bağlı məsələlərə həsr olunmuş çıxışları Xəzər Universiteti tələbələrinə və qonaqlara elmi-akademik yeniliklərin çatdırılması məqsədi daşıyırdı. 

Zaur Həsənovun bilavasitə tədqiqat sahəsi ilə bağlı təqdim etdiyi “Klassik mənbələrdə skiflər və digər şərq xalqları” adlı mühazirəsi diqqətlə dinlənilmiş və iştirakçıların marağına səbəb olmuşdur. Mövzu Humanitar, təhsil və sosial elmlər fakültəsinin tarix və tarix-coğrafiya müəllimliyi tələbələrinə “Qədim Dünya tarixi 2” fənni çərçivəsində antik sivilizasiyaların tədqiqində müasir gedişatın və elmi yeniliklərin bilavasitə tədqiqatçılar tərəfindən açıqlanması baxımından müəyyən edilmişdi.

Dr. Rüxsarə Quliyevanın təqdim etdiyi “Roma respublikasında dövlət idarəçiliyi” adlı mühazirə Qədim Roma cəmiyyətində dövlətçilik və idarəçilik münasibətlərinin kökləri, formalaşması, təşəkkülü və təkamülünün tələbələrə mütəxəssis sözü ilə aşılanması məqsədilə müəyyən olunmuşdu. Bəhs edilən mövzu tədris ilə bilavasitə bağlı olub, tələbələrin fənn üzrə biliklərinin və antik sivilizasiyalar ilə bağlı dünyagörüşünün inkişafı baxımından mühüm əhəmiyyət daşıyırdı.

Tədbir çoxsaylı sualların cavablandırılması və maraqlı diskussiya ilə sona yetib.