2025-ci il mayın 21-də Xəzər Universitetinin təsisçisi, Direktorlar və Qəyyumlar Şurasının sədri Prof.Akd. Hamlet İsaxanlı və universitetin İqtisadiyyat və menecment fakültəsinin dekanı Dr. Raziyə İsaeva Şimali Kiprin Famaqusta şəhərində yerləşən Şərqi Aralıq Dənizi Universitetinə (EMU) rəsmi səfər ediblər. Səfərin əsas məqsədi EMU-nun Turizm fakültəsi tərəfindən təşkil edilən nüfuzlu VII Beynəlxalq Türk Dünyası Turizm Konfransında iştirak etmək idi.

Konfransdan öncə nümayəndə heyəti universitetlərarası əməkdaşlığın mümkün sahələrinin öyrənilməsi və EMU-nun akademik potensialı ilə tanışlıq məqsədilə EMU-nun Mühəndislik Fakültəsi, İncəsənət və Elmlər Fakültəsi, Memarlıq Fakültəsi, Əczaçılıq Fakültəsi, Tibb Fakültəsi, Diş Həkimliyi Fakültəsi, Kompüter və Texnologiya Məktəbi və Turizm və Qonaqpərvərlik İdarəetməsi Məktəbində olublar

Nümayəndə heyəti EMU-nun rektoru Prof. Dr. Həsən Kılıç, Beynəlxalq əlaqələr üzrə prorektor Prof. Dr. Osman Karadağ, Tədris işləri üzrə prorektor Prof. Dr. Əli Öztüren və digər rəhbər şəxslərlə görüşlər keçirib. Görüşlər zamanı turizm, iqtisadiyyat və idarəetmə sahələrində birgə təhsil və tədqiqat təşəbbüsləri, tələbə və müəllim mübadiləsi proqramları, eləcə də potensial ikili diplom proqramlarının yaradılması məsələləri müzakirə edilib.

VII Beynəlxalq Türk Dünyası Turizm Konfransı türk dünyasının müxtəlif ölkələrindən gəlmiş alimləri, sahə mütəxəssislərini və siyasətçiləri bir araya gətirərək, dayanıqlı turizm, rəqəmsal transformasiya və mədəni əlaqələrin gücləndirilməsi kimi aktual mövzulara həsr olunmuşdur. Konfrans turizm sahəsində təhsil və siyasət baxımından bilik və təcrübə mübadiləsi üçün dəyərli bir platforma rolunu oynamışdır.

Konfransın rəsmi açılış mərasimində Prof.Akad. Hamlet İsaxanlı çıxış etmişdir. Turizmin gələcək inkişafında təhsilin rolu  və mədəniyyətlərarası dialoqun əhəmiyyəti haqqında onun söylədikləri iştirakçılar tərəfindən böyük maraqla qarşılanmışdır.

 Şimali Kipr Türk Respublikasının Prezidenti  Ersin Tatar öz çıxışında Prof.Akad. İsaxanlının fikirlərinə xüsusi yer ayırmış və bu çıxışı iki ölkə arasında akademik və mədəni əlaqələrin inkişafı kontekstində yüksək qiymətləndirmişdir.

Səfər zamanı EMU tərəfindən nümayiş etdirilən yüksək səviyyəli qonaqpərvərlik və peşəkarlıq universitetin beynəlxalq akademik tərəfdaşlıqlara verdiyi dəyəri bir daha təsdiqləmişdir.

Bu səfər Xəzər Universiteti ilə Şərqi Aralıq Dənizi Universiteti arasında akademik və mədəni əlaqələrin daha da dərinləşməsinə böyük töhfə vermişdir. Turizm təhsilinin inkişafı və türk dünyasında regional əməkdaşlığın gücləndirilməsi istiqamətində ortaq maraqlar gələcəkdə hər iki universitet üçün faydalı olacaq yeni birgə təşəbbüslərin formalaşmasına zəmin yaradacaqdır.