2025-ci il mayın 16-da Xəzər Universiteti Elmi Şurasının növbəti iclası keçirildi.

İclası Xəzər Universitetinin rektoru vəzifəsini icra edən Prof. Məhəmməd Nuriyev açaraq, gündəlikdəki məsələləri Elmi Şura üzvlərinin nəzərinə çatdırdı.

Gündəliyin birinci məsələsi olan məzunlar haqqında məlumatları Təbiət elmləri və mühəndislik fakültəsinin dekanı Fəxrəndə Əfəndiyeva, İqtisadiyyat və menecment fakültəsinin dekanı Raziyə İsayeva, Humanitar, təhsil və sosial elmlər fakültəsinin dekan vəzifəsini icra edən Aygün Verdiyeva, Təbiət elmləri, sənət və texnologiya yüksək təhsil fakültəsinin dekanı Günel Bahəddinova və İqtisadiyyat və biznes yüksək təhsil fakültəsinin dekanı İnqilab Əhmədov təqdim etdilər. Universitetin məzun olan bakalavriatura və magistratura tələbələrinin  GPA-ləri, ixtisasları və s. haqqında ətraflı məlumatlar dinlənildi və müzakirələr aparıldı.

Gündəliyin ikinci məsələsi 3347.01 “Nanotexnologiya və nanomateriallar” (fizika sahəsi üzrə) ixtisası üzrə təhsil alan doktorant Validə Rəfail qızı Əliyevaya ikinci elmi rəhbərin təyin edilməsi idi. Bu məsələ barədə elmi katib Günel Bahəddinova ətraflı məlumat verdi. Türkiyəninin Manisa Cəlal Bayar Universitetinin “Elektronika və avtomatika” kafedrasının müdiri Dos. Levent Mustafa oğlu Paralı Elmi Şuranın qərarına əsasən doktorantın ikinci elmi rəhbəri təyin edildi.

Professor Məhəmməd Nuriyev qeyd etdi ki, Xəzər Universitetinin səlahiyyətli şəxsləri tərəfindən doktorantura təhsil səviyyəsi üçün yeni əsasnamə tərtib olunub. Əsasnamədə doktorantura səviyyəsində təhsil ilə bağlı elmi nəşrlərlə, dərslərin tədris olunması və universitetdaxili müdafiə prosesi ilə bağlı yeni tələblər öz əksini tapıb.  Əsasnamə müzakirə olundu və şura üzvləri tərəfindən qəbul edildi.

Elmi Şuranın növbəti məsələsi Dillər və ədəbiyyatlar departamentinin dosenti fil.ü.f.d. Ülvi Allahverdi oğlu Babasoya dosent adının verilməsi üçün Azərbaycan Respublikası Prezidenti yanında Ali Attestasiya Komissiyası qarşısında vəsatət qaldırılması ilə bağlı universitetin Elmi Şurasına olunmuş müraciət müzakirə edildi. Elmi Şuranın katibi iddiaçı haqqında ətraflı məlumat verdi. Sonra hesablama komissiyası yaradılaraq, gizli səsvermə keçirildi. Hesablama komissiyasının sədri tərəfindən nəticə şura üzvlərinə açıqlandı və protokol tərtib edildi.

İclasın sonunda  cari məsələlər müzakirə olundu.

Elmi şuranın gündəliyindəki bütün məsələlər müzakirə olunaraq, müvafiq qərarlar qəbul  edildi.