2025-ci il mayın 21-də  Xəzər Universitetinin Nərimanov korpusunda Dillər və ədəbiyyatlar departamentinin təşkilatçılığı ilə Azərbaycan peşəkar musiqisinin banisi, dahi bəstəkar, dramaturq və ictimai xadim Üzeyir Hacıbəylinin anadan olmasının 140 illiyinə həsr olunmuş “XX əsrin əvvəllərində Üzeyir Hacıbəylinin milli istiqlal mübarizəsi” (arxiv materialları əsasında) adlı seminar təşkil olunmuşdur.

Dillər və ədəbiyyatlar departamentinin müdiri, Dos. Dilbər Zeynalova Üzeyir Hacıbəylinin Azərbaycan müsiqi tarixinin ən böyük simalarından biri olduğunu, Azərbaycan xalq musiqisini notlara köçürərək, onun elmi əsaslarla öyrənilməsinə töhfə verdiyini, musiqili komediyaların, müxtəlif ləqəblərlə dövrün mühüm ictimai-siyasi, maarifçilik məsələlərinə dair çoxlu məqalə, felyeton və satirik miniatürlərin müəllifi olduğunu vurğuladı.

 AMEA M. Füzuli adına Əlyazmalar İnstitutunun Şəxsi arxivlərin tədqiqi söbəsinin aparıcı elmi işçisi Aytən İmanova Üzeyir Hacıbəylinin həm də xalqının azadlığı, milli kimliyi və maariflənməsi uğrunda yorulmadan çalışan əsl ziyalı və vətənpərvər olduğunu qeyd etdi. Arxiv materialları əsasında apardığı araşdırmaların nəticəsini  tədbir iştirakçıları ilə  bölüşdü. Məruzədən sonra tələbələrin suallarını cavablandırdı.

Tədbirdə Dillər və ədəbiyyatlar departamentinin müəllimləri Dos. Xatirə  Yusifova, Dos. Zivər Hüseynli Baylan, Dr. Almaz Bədəlova, Sevinc Allahverdiyeva da  çıxış edərək, mövzu ətrafında mülahizələrini bildirdilər.