2025-ci il  mayın 16-da  Xəzər Universitetində Elm və Təhsil Nazirliyinin “Azərbaycan dili və ədəbiyyat tədrisi” elmi-metodik jurnalının və “Konstitusiya və Suverenlik İli”nə həsr edilmiş “Dil siyasəti və milli kimlik: Tarixi irs, müasir yanaşmalar” adlı xüsusi buraxılışının təqdimatı keçirilmişdir. Dillər və ədəbiyyatlar departamentinin Dillər bölməsinin koordinatoru Dr. Sevinc Qəmbərova, Humanitar, təhsil və sosial elmlər fakültəsinin dekan müavini Pərvin Kərimova gənc tədqiqatçılar üçün belə görüşlərin böyük faydasından danışmışlar. Jurnalın baş redaktoru vəzifəsini icra edən Gülnar Əliyeva jurnalın yaranması, tarixi, inkişafı, qəbul edilən məqalələrə qoyulan tələblər, jurnalın indeksləndiyi beynəlxalq elmi bazalar və s. haqqında əhatəli çıxış etmiş və xüsusi buraxılışda məqalələri çap edilən müəlliflərə söz vermişdir.

AMEA Nəsimi adına Dilçilik İnstitutunun “Türk dilləri” şöbəsinin müdiri, Prof.İsmayıl Kazımov “Dilin axarı və ya müasir Azərbaycam dili nüfuzlu və suveren dillərdən biri kimi” mövzusunda, ADPU-nun “Azərbaycan dili və onun tədrisi texnologiyası” kafedrasının professoru Minaxanım Nuriyeva Təkləli “Dilimiz-qayğılarımız: mülahizələr, iradlar, təkliflər” mövzusunda, “Azərbaycan dili və ədəbiyyat” elmi-metodik jurnalının redaksiya heyətinin üzvləri, ADPU-nun “Ədəbiyyatın tədrisi texnologiyası” kafedrasının dosentləri - Bilal Həsənli və Soltan Hüseynoğlu çıxışlarında nəşrlə uzunmüddətli əməkdaşlıq təcrübələrindən söz açmış, jurnalın elm və təhsil mühitindəki rolunu yüksək qiymətləndirmişlər.

Bakı Dövlət Universitetinin “Azərbaycan dili və ədəbiyyatının tədrisi metodikası” kafedrasının müdiri, Prof. Mətanət Abdullayeva çıxışında jurnalın metodika sahəsindəki elmi əhəmiyyətini vurğulamış, gələcək elmi əməkdaşlıq imkanlarını yüksək qiymətləndirmişdir. Bakı Mühəndislik Universitetinin “Azərbaycan dili və pedaqogika” kafedrasının dosenti Zabitə Teymurlu və Xəzər Universitetinin müəllimi Dr. Sevinc Qəmbərova cıxış edərək, xüsusi buraxılışda dərc olunmuş “Akademik kommunikasiyada Azərbaycan dilinin yeri” mövzusunda məqalələrinin əsas məqamlarını təqdim etmiş, mövzunun aktuallığına və jurnalın elmi əhəmiyyətinə toxunmuşlar.

Tədbirdə jurnalın son illərdə baş redaktoru olmuş, hazırda isə Azərbaycan Təhsil İşçiləri Azad Həmkarlar İttifaqı (ATİAHİ) Xətai Rayon Komitəsinin sədri Sehran Səfərov çıxış edərək, nəşrin son dövrlərdəki fəaliyyəti barədə fikirlərini bölüşmüş, xüsusi buraxılışın elmi və ictimai əhəmiyyətini vurğulamış və jurnalın yaradıcı heyətinə uğurlar arzulamışdır.

Tədbirdə ADPU-nun “Ədəbiyyat” kafedrasının dosent əvəzi, Dr. Ulduz Qəhrəmanova, “Azərbaycan dili və onun tədrisi texnologiyası” kafedrasının müəllimi Aynur Bədəlova, “Müasir Azərbaycan dili” kafedrasının baş müəllimi, Dr.Sahilə İbrahimova, “Ədəbiyyatın tədrisi texnologiyası” kafedrasının baş müəllimi, Dr. Günel Hümmətova, Xəzər Universitetinin və Dünya məktəbinin müəllimləri, həmçinin magistrantlar, tələbələr, gənc tədqiqatçılar iştirak etmişlər.