Xəzər Universitetinin təsisçisi, Direktorlar və Qəyyumlar Şurasının sədri Prof. Akad. Hamlet İsaxanlı və İngilis dili və ədəbiyyatı departamentinin müdiri Dr. Milana Abbasovanın rəhbərlik etdiyi Xəzər Universitetinin nümayəndə heyəti 2025-ci il mayın 6-7- də Çin Xalq Respublikasının Hefey şəhərində yerləşən Anhui Universitetinə rəsmi səfər etdi.

Rəsmi proqram Anhui Universitetinin Partiya Komitəsinin katibi, Prof. Yu Baotao`nun qonaqları səmimi salamlaması ilə başladı. O, iki təhsil müəssisəsi arasında elmi və təhsil əlaqələrinin gücləndirilməsinin əhəmiyyətini vurğuladı. Çıxışında sazişin akademik mübadilə və birgə tədqiqatlar vasitəsilə regional əməkdaşlığı inkişaf etdirmək potensialını qeyd etdi.

Prof. Hamlet İsaxanlı açılış nitqi ilə çıxış edərək, Anhui Universitetinin qonaqpərvərliyinə görə təşəkkürünü bildirdi və Xəzər Universitetinin qlobal akademik dialoq və innovasiyanı təşviq etmək öhdəliyini təsdiqlədi. Proqramın bir hissəsi olaraq, Dr. Milana Abbasova Xəzər Universiteti, universitetin tədqiqat üstünlükləri və beynəlxalq əlaqələri  haqqında qısa məlumat verdi.

Məhsuldar müzakirələr sessiyasından sonra iki universitet Anlaşma Memorandumunu rəsmi olaraq imzaladı. İmzalanma mərasimindən sonra qrup şəkli çəkildi və Anhui Universitetinin kampusuna tur təşkil edildi ki, bu da Xəzər Universitetinin nümayəndə heyətinə qəbul edən təhsil müəssisəsinin akademik atmosferi və tədqiqat imkanları haqqında daha dərin məlumat əldə etməyə imkan verdi.

Səfərin ikinci günündə nümayəndə heyəti Anhui Universitetinin bir sıra əsas akademik və tədqiqat bölmələri ilə, o cümlədən Süni İntellekt Məktəbi, İnteqral Sxemlər üçün Qabaqcıl Materiallar və Texnologiyaların Sənaye-Təhsil-Tədqiqat İnstitutu, Kompüter Elmləri və Texnologiyaları Məktəbi və Elektron və İnformasiya Mühəndisliyi Məktəbi il tanış oldu. Bu, Anhui Universitetinin qabaqcıl tədqiqat və texnoloji təşəbbüsləri ilə tanış olmaq üçün dəyərli imkan yaratdı.

Səfər vida naharı və nümayəndə heyətinin Hefeydən yola düşməsi ilə başa çatdı.