Xəzər Universiteti Psixologiya departamentinin müəllimi Ülkər İsayevanın da həmmüəlliflərdən biri olduğu “The International Work Addiction Scale (IWAS): A screening tool for clinical and organizational applications validated in 85 cultures from six continents” (“Beynəlxalq İş Asılılığı Şkalası (IWAS): Altı qitədən 85 mədəniyyətdən təsdiq edilmiş, klinik və təşkilati tətbiqlər üçün ölçmə aləti”) adlı məqalə “Journal of Behavioral Addictions” jurnalında dərc edilmişdir. Qeyd edək ki, jurnal davranış asılılıqları ilə bağlı elmi məlumat mübadiləsi etmək və davranış asılılıqları, eləcə də genetik, neyrobioloji, psixoloji, klinik psixiatrik, epidemioloji, sosial və antropoloji yanaşmalarla bağlı tədqiqatları özündə əks etdirir. “Journal of Behavioral Addictions” dünyada ən nüfuzlu məqalələr toplusu kimi Q1 olaraq indekslənən jurnallardan biri olaraq qəbul olunur.
Məqalədə son illərdə iş asılılığı mövzusunda aparılan elmi araşdırmalar nəticəsində mühüm irəliləyişlər əldə edilsə də, bu sahədəki əsas problemlərdən biri olaraq dünya miqyasında etibarlı və keçərli bir ölçmə alətinin olmadığı vurğulanıb. Bu çatışmazlığı aradan qaldırmaq məqsədilə həyata keçirilən bu tədqiqat iş asılılığını elmi şəkildə müəyyənləşdirmək üçün mədəniyyətlərarası güvənirliyi və keçərliliyi olan şkala olaraq formalaşdırılıb.
Beynəlxalq İş Asılılığı Şkalası (IWAS) 16 maddədən ibarət anket, dünya üzrə 85 fərqli mədəniyyətdən olan 31.352 işçi üzərində tətbiq edilib. Tədqiqatın nəticələrinə əsasən iş asılılığı ilə iş stresinin yüksək olması, iş məmnuniyyəti və özünə inam arasında əlaqə müəyyən edilmişdir. Araşdırma IWAS ilə fərqli mədəniyyətlərdə və dillərdə etibarlı nəticələr əldə etməyin mümkün olduğunu, həmçinin klinik və təşkilati mühitlərdə də istifadə oluna biləcəyini göstərir.
Tədqiqatın nəticələri iş asılılığının qlobal bir problem olaraq daha geniş şəkildə müzakirə olunmasını və araşdırılmasını tövsiyyə edir.
Copyright © Xəzər Universiteti, 2025
