2024-cü il dekabrın 4-də Xəzər Universitetinin Nərimanov kampusunda Türk dünyasının birliyinə gətitrib çıxaran inkişaf yoluna aid beynəlxalq elmi seminar keçirildi. Tədbir Xəzər Universiteti Mədəni Antropologiya və Folklor İnstitutunun təşəbbüsü ilə təşkil olunmuşdu.

Seminarın açılışını institutun koordinatoru, Dos. Aynur Qəzənfərqızı etdi. O, Türk Dövlətləri Təşkilatının (TDT) keçdiyi tarixi yoldan bəhs etdi. Təşkilatın 2009-cu ildə Naxçıvanda keçirilmiş ilk toplantısının “Türkdilli Dövlətlər Sammiti” adlandırılmasının tarixi və siyasi mühitin təsiri ilə olduğunu vurğuladı və müasir günümüzdə TDT-nin yaranmasının ciddi siyasi təsir və təzyiq ilə əmələ gəldiyini bildirdi. Sonra A. Qəzənfərqızı tədbirin məruzəçilərini tələbələrə təqdim edərək, sözü onlara verdi.

İlk məruzəçi Qazaxıstanın Əl-Fərabi Universitetinin görkəmli alimi, folklorşünas professor Anarbay Buldubayev oldu. O, “Qazax-Azərbaycan folklorunda ortaq süjetlər” mövzusunda qazax dilində çıxış edərək, iki xalqın folklorunda rast gəlinən mədəni bağları və ortaq motivləri geniş izah etdi.

Pamukkale Universitetinin (Türkiyə) Sosial insan və toplum elmləri fakültəsi Türkologiya bölümünün rəhbəri professor Turgut Tok “Türkcənin coğrafiyası” adlı məruzəsi ilə Türk dilinin geniş yayılma arealını və tarixi inkişafını ətraflı nəzərə çatdırdı. Məruzədə Türk dünyasının dil baxımından keçmişi, bu günü və gələcəyi ilə bağlı əhəmiyyətli məsələlər vurğulandı.

Seminarda albaniyalı tədqiqatçı, “Albaniya-Azərbaycan Dostluq Dərnəyi”nin sədri Entela Muço “Azərbaycan-Albaniya əlaqələrinin tarixi” mövzusunda məruzə edərək, hər iki xalq arasındakı tarixi və mədəni əlaqələrdən danışdı. Bu mövzu tələbələr üçün xüsusilə maraqlı idi, çünki onlar Azərbaycanla uzaq ərazilərdə yaşayan xalqlar arasındakı bağlarla yaxından tanış olmaq imkanı qazandılar.

Son məruzəçi Azərbaycanda Atatürk Mərkəzinin şöbə müdiri, aşıq sənətinə dair yeni yanaşmaları ilə tanınan dosent Nazir Əhmədli idi. O, “Azərbaycan türkcəsi haqqında”  məruzəsində Azərbaycan türkcəsinin zəngin lüğət fondu və tarixi inkişafı haqqında ətraflı danışaraq, mövzunun əhəmiyyətini vurğuladı.

Seminarın sonunda dosent Aynur Qəzənfərqızı məruzəçilərə təşəkkür edərək, bu cür elmi tədbirlərin Türk xalqlarının birliyinin güclənməsinə xidmət etdiyini söylədi.

 Seminarın sonunda tələbələrin sualları cavablandırıldı, fəal müzakirələr aparıldı.

Aydan Nəsirli

Xəzər Universiteti, Filologiya (İngilis dili və ədəbiyyatı) ixtisası, II kurs