2024-cü il mayın 3-də Xəzər Universitetinin Psixologiya departamentinin koordinatoru Mələk Kərimovanın dəvəti ilə "Danceability Azərbaycan"ın təsisçisi Nigar Sultanova "Sənət terapiyası" dərsində qonaq qismində iştirak edib. Seminarda rəqs terapiyasının tarixi inkişafı, faydalılığı və tətbiqi müzakirə olunub.
Son illərdə dünyada geniş tətbiq olunan və psixi narahatlıqların həllində alternativ bir vasitə kimi diqqət çəkən rəqs terapiyası dərsin əsas mövzusu olub. Nigar Sultanova tələbələrə rəqs terapiyasının əsas prinsiplərini izah edərək, onu praktiki olaraq necə tətbiq etməyi əyani şəkildə nümayiş etdirib. Tələbələr də rəqs terapiyasında iştirak edərək, bu təcrübənin onların ruhi sağlamlığına müsbət təsirlərini hiss etdiklərini bildiriblər.
Tədbir tələbələrin böyük marağına səbəb olub və rəqs terapiyasının ruhi sağlamlıq üçün faydalarını əyani şəkildə nümayiş etdirib.