2024-cü il yanvarın 23-26-da Xəzər Universiteti İqtisadiyyat və menecment fakültəsinin dekanı Dr. Ceyhun Məmmədov və Təbiət elmləri və mühəndislik fakültəsinin dekanı Dr. Fəxrəndə Əfəndiyeva Gürcüstanın Tiflis şəhərində Biznes və Texnologiya Universitetində (BTU) “Azərbaycan, Gürcüstan və Ukrayna ilə Tərəfdaşlığın Qarşılıqlı Gücləndirilməsi İstiqamətində Avropa Enerji Effektivliyi - 3E-Tərəfdaşlıq” adlı Erasmus+ CBHE layihəsinin rəsmi açılış tədbirində iştirak ediblər.

İclas BTU-da davam edən beynəlxalq layihələrin tədqiqini, 3E-Tərəfdaşlıq layihəsinin əsas məqsəd və strategiyalarının araşdırılmasını, konkret tapşırıq və məsuliyyətlərin təfərrüatlarının təqdim edilməsini, gözlənilən nəticələr, layihənin effektiv idarə edilməsi üçün istifadə olunan idarəetmə üsulları və vasitələrin müzakirəsini, ilkin addımların nəzərdən keçirilməsini, həyata keçirilməsi nəzərdə tutulan fəaliyyətlər və 3E-Tərəfdaşlıq ilə əlaqəli maliyyə aspektlərinin həlli kimi məsələləri əhatə edib.

Xəzər Universitetinin və tərəfdaş universitetlərin nümayəndələri öz beynəlxalq layihələrini və enerji ilə bağlı təhsil və tədqiqatlar sahəsində potensiallarını vurğulayan təqdimatlarla çıxış ediblər. 3E-Tərəfdaşlıq layihəsinin məqsədi Azərbaycan, Gürcüstan və Ukraynadakı ali təhsil müəssisələrini modernləşdirmək və gücləndirmək, eyni zamanda onların enerjiyə davamlılıq və regionlararası əməkdaşlıq imkanlarını artırmaqdır. Bu məqsədə nail olmaq üçün layihə iki əsas məsələyə diqqət yetirir:

• Müasir səriştələri inkişaf etdirmək üçün enerji səmərəliliyi sahəsində kurrikulumun təkmilləşdirilməsinin birgə layihələndirilməsi;
• İştirakçı ali məktəblər arasında Enerji Laboratoriyaları və Yaşıl Şəbəkə üçün əməkdaşlıq və şəbəkə strukturlarının yaradılmasının asanlaşdırılması.

Layihə bu məsələləri vurğulayaraq, hədəf ölkələrin təhsil və inkişaf çərçivələri daxilində innovasiya və davamlı inkişafı təşviq etmək məqsədi daşıyır.