Hamlet İsaxanlı – 75

Hörmətli Hamlet müəllim!

Sizi - tanınmış yazıçı və alimi 75 illiyiniz münasibətilə təbrik edirik. 

Siz 1965-ci ildə orta məktəbi qızıl medalla bitirib, Bakı Dövlət Universitetinin (indiki BDU-nun) Mexanika-riyaziyyat fakültəsinə qəbul olunmuş, 1970-ci ildə buranı fərqlənmə diplomu ilə bitirmisiniz. 1970-1973-cü illərdə Azərbaycan Elmlər Akademiyası Riyaziyyat və Mexanika İnstitutu tərəfindən M.V.Lomonosov adına Moskva Dövlət Universiteti Mexanika-riyaziyyat fakültəsinin aspiranturasına oxumağa göndərilmiş, 1973-cü ildə dissertasiya işini müdafiə edərək, fizika-riyaziyyat elmləri namizədi alimlik dərəcəsi almısınız. 

1973-1983-cü illər ərzində M.V.Lomonosov adına Moskva Dövlət Universitetində, SSRİ Elmlər Akademiyasının V.İ.Steklov adına Riyaziyyat İnstitutunda, Azərbaycan Elmlər Akademiyası Riyaziyyat və Mexanika İnstitutunda, Bakı Dövlət Universitetində çalışmış, elmi-tədqiqatla və pedaqoji işlə məşğul olmusunuz. Sonra Azərbaycan Dövlət Neft Akademiyası və Leninqrad Maliyyə və İqtisad İnstitutunun Bakı filialında professor və kafedra müdiri kimi fəaliyyət göstərmisiniz. 

Keçmiş SSRİ, ABŞ, Böyük Britaniya, Kanada və Almaniya kimi ölkələrin nüfuzlu elmi jurnal və məcmuələrində elmi-tədqiqat əsərləriniz dərc olunub. 1983-cü ildə Moskvada SSRİ Elmlər Akademiyası V.İ.Steklov adına Riyaziyyat İnstitutunda "Çoxparametrli spektral nəzəriyyənin bəzi məsələləri" mövzusunda dissertasiya müdafiə edərək, fizika-riyaziyyat elmləri doktoru alimlik dərəcəsi almısınız; bir qədər sonra professor adına layiq görülmüsünüz. 

1991-ci ildə Azərbaycanda ingilisdilli universitetin yaranmasına təşəbbüs göstərmiş, 1991-ci ildə rəsmi status alan bu ali məktəbi təsis etmiş, Azərbaycanın ilk özəl universitetinin qurucu rektoru olaraq fəaliyyətə başlamısınız. Bir qədər sonra yeni – Xəzər Universiteti adını alan bu elm, təhsil və mədəniyyət ocağı Azərbaycanın dünyada tanınan universitetlərindən birinə çevrilmişdir. 

Siz müasir çoxparametrli spektral nəzəriyyənin yaradıcılarından biri sayılırsınız. Riyaziyyatın riyazi fizikadan qaynaqlanan bu çox mühüm sahəsində dərin tədqiqatlar aparan ilk sovet riyaziyyatçısı kimi adınız elm tarixinə düşmüşdür. 

Siz Azərbaycanda və onun hüdudlarından kənarda təkcə alim və elm-təhsil təşkilatçısı kimi deyil, həm də şair, yazıçı kimi də tanınırsınız. Gənclik illərindən şeir yazmış, lakin onları uzun müddət çap etdirməmisiniz. Azərbaycanda, Rusiyada, Çində, İranda, Türkiyədə, Gürcüstanda, Pakistanda, Finlandiyada və digər ölkələrdə şeir kitablarınız nəşr olunmuşdur. Şeirləriniz rus, ingilis, Çin, gürcü, eston, finland, türk və digər dillərə tərcümə olunmuşdur. 

Yaradıcılığınıza tərcümə işi də daxildir. V.A.Jukovski, F.Baratinski, F.İ.Tütçev, A.Fet, S.Yesenin, N.Qumilyov, A.Axmatova, A.Axundova, C.Q.Bayron, V.Bleyk, R.Herrik və G.De Nerval kimi rus, ingilis və fransız şairlərinin şeirlərini orijinaldan Azərbaycan dilinə çevirmisiniz. 

Şeirlərinizə xeyli sayda musiqi bəstələnmişdir. 

Ədəbi ictimaiyyətin maraqla qarşıladığı "Təzadlar", "Bu da bir həyatdı", "Dördlüklər", "Ziyarət", "Şeirə dönən duyğular" (Təbriz), "Təzadlar" (Təbriz), "Bu da bir həyatdı" (Təbriz), "Sitotxlis Poezia" (gürcü dilində), "İntellekt" (Tbilisi), "Təzadlar" və "Bu da bir həyatdı" (Çin dilində), "Compilation & Translation Press" (Pekin) kitablarının müəllifisiniz. 

Ədəbi və elmi uğurlarınız "Yusif Məmmədəliyev", "Qızıl Qələm", "Səməd Vurğun", "Zahid Xəlilov", "Cəfər Cabbarlı" mükafatlarına, "Milli Türklüyə xidmət" ödülünə, TÜRKSOY medalına layiq görülmüsünüz. 

Hörmətli Hamlet müəllim!

Sizi bir daha yubileyiniz münasibətilə təbrik edir, uzun ömür, cansağlığı, yaradıcılıq uğurları arzulayırıq.

Azərbaycan Yazıçılar Birliyi

“Ədəbiyyat qəzeti”, 4 mart 2023-cü il