2022-ci il dekabrın 16-da Xəzər Universiteti və Milli Erasmus+ Ofisinin birgə təşkilatçılığı ilə Erasmus+ Məlumat gününə həsr olunmuş tədbirdə heyvanların rifahı ilə əlaqəli “Dayanıqlı İstehsal və İstehlak üçün Xoşbəxt Heyvanlar” (Happy animals for sustainable production and consumption - HAnimSPAC) adlı layihə haqqında təqdimat edildi. Tədbirdə ölkənin müxtəlif universitetlərindən və təşkilatlarından 80-ə yaxın iştirakçılar, Azərbaycanın region unversitetləri və Qazaxıstanın ABAY universiteti onlayn qoşulmuşlar.
Universitetin Həyat elmləri departamentinin dosenti Cavid Ocaqi layihənin məqsədi haqqında iştirakçılara geniş məlumat verdi. Bu layihə “Baltik Dənizi Regionunda Akademik Əməkdaşlıq” (“Academic collaboration in the Baltic Sea region”) üzrə Sosial İnnovasiya (SI) proqramı tərəfindən maliyyələşdirilmişdir. Layihənin icraçısı İsveç Kənd Təsərrüfatı Elmləri Universitetidir (SLU). Tərəfdaş ölkələr isə Latviya, Litva, Estoniya, Ukrayna və Azərbaycandır. Layihənin məqsədi makro-regional səviyyədə təcrübə mübadiləsini, təcrübələrin, metodologiyanın və beynəlmiləlləşdirmə potensialının ali təhsil və elmi tədqiqat çərçivəsində birgə inkişafını gücləndirməkdir.
Layihə çərçivəsində Azərbaycanın müxtəlif regionlarında heyvanların rifahı ilə əlaqədar fermerlər və istehlakçılar arasında sorğular həyata keçirilmişdir.
Hal hazırda layihədə iştirak edən Ukrayna və Azərbaycan fermerləri və istehlakçıları arasında aparılmış sorğulardan əldə olunan məlumatların statistik təhlil olunması və məqalələrin yazılması üzərində iş gedir.
Layihə haqqında təqdimat tədbir iştirakçıları tərəfindən böyük maraqla dinlənildi və geniş müzakirələr aparıldı.