2016-cı il martın 10-da İraq Respublikasının səfirliyinin müvəqqəti işlər vəkili Dr. Fazil Avvad Əşşüveyli Xəzər Universitetinin nəzdində fəaliyyət göstərən “Dünya” məktəbini ziyarət etdi. Səfər İraq səfirliyində bu ilin əvvəlində Xəzər Universitetinin Beynəlxalq Əlaqələr Şöbəsinin təşkilatçılığı ilə 2016-2017-ci tədris ili üçün qəbul planı çərçivəsində keçirilən görüşün davamı hesab olunur.

“Dünya” məktəbinin direktoru Mərufə Mədətli və IB Proqramının koordinatoru Rəna Həsənova İraq Respublikasının səfirliyinin müvəqqəti işlər vəkili Dr. Fazil Avvad Əşşüveylini və onun tərcüməçisi Nemət Ağalını qəbul etdilər. “Dünya” məktəbinin direktoru Mərufə Mədətli təhsil proqramları, dərslərin təşkili, məktəbdənkənar fəaliyyət və məktəbin resursları haqqında təqdimat verdi. Rəna Həsənova “Dünya” məktəbinin IB proqramı barədə məlumat verdi. O, həmçinin,  məktəbin qarşıdan gələn tədbirləri haqqında məlumat verərək, qonaqları tədbirlərə dəvət etdi. Qonaqlar üçün məktəb turu təşkil edildi.

Dr. Fazil Avvad Əşşüveyli dəvətə və təşkil olunmuş tura görə məktəb nümayəndələrinə təşəkkür etdi, məktəb, onun strukturu, resursları və fəaliyyəti barəsində məmnuniyyətini dilə gətirdi.