2020-ci il fevralın 21-də Xəzər Universitetinin “Mərmər” zalında universitetin əməkdaşları və tələbələr üçün Xüsusi Təhlükəli İnfeksiyalara Nəzarət Mərkəzinin (XTİNM) mütəxəssisləri –Aytac Nəsirli, Cəlalə Həsənova, Koronavirus infeksiyası haqqında tanıdıcı təqdimat keçirdilər. Təqdimatı departamentin rəhbəri Asəf Ömərov açaraq qonaqları və tədbir iştirakçılarını salamladı. O, zoonoz mənşəli xəstəliklərin insan sağlamlığında rolu, onların yayılması haqqında giriş nitqi söylədikdən sonra sözü XTİNM-nin mütəxəssislərinə verdi. Mütəxəssislər koronavirus infeksiyası –onun epidemiologiyası, etiologiyası, patogenezi, simptomları, laborator diaqnostikası, profilaktikası, müalicəsi haqqında məlumat verməklə, qonşu ölkələrdə baş vermiş alovlanma hallarının, xəstəliyin son statistik məlumatlarını tədbir iştirakçılarının diqqətinə çatdırdı. XTİNM-nin mütəxəssisləri bu təhlükəli virusla bağlı tədbir iştirakçılarında yaranmış sualları cavablandırdılar. Tədbirin sonunda universitetin rektoru Dr. İradə Xəlilova qonaqlara təşəkkürünü bildirməklə, seminar iştirakçılarına universitetdə aparılmış ümumi profilaktika tədbirlərini bir daha xatırlatdı. Həmçinin, rektor ictimai nəqliyyatdan istifadə edərkən, qida qəbulundan öncə, respirator əlamətləri olan insanlarla münasibət, xəstə olarkən, gözlənilməsi vacib olan fərdi gigiyena qaydaları haqqında seminar iştirakçılarına məlumat verdi.