2019-cu il iyulun 14-28 Xəzər Universitetinin Regionşünaslıq (Avropa) ixtisası üzrə magistratura təhsili alan 3 tələbəsi - Aygün Əliyeva, Asiman Qocayev, Cəfər Allahverdiyev və Biznesin idarə edilməsi üzrə magistratura təhsili alan tələbəsi Nərmin Əliyeva Tbilisi və Oslo şəhərlərində yay məktəbində təlim keçmişlər. Tələbələrə yay məktəbi ərzində İqtisadiyyat və menecment fakültəsinin dekanı Dr. Ceyhun Məmmədov və Siyasi elmlər və fəlsəfə departamentinin müdiri Dr. Elmar Mustafayev rəhbərlik etmişlər.

Yay məktəbi “Cənubi Qafqaz və Norveçdə akademik mühitdə mədəniyyətlərarası münasibətlər” layihəsi çərçivəsində təşkil edilmişdi və Oslo Metropolitan Universiteti, Xəzər Universiteti və Tbilisi Dövlət Universitetindən olan tələbələr üçün nəzərdə tutulmuşdu.

Yay məktəbinin məqsədi tərəfdaş universitetlər arasında sıx əməkdaşlıq qurmaq, mədəniyyətlərarası dialoqa töhfə vermək və bu sahədə tələbələrin bilik və bacarıqlarını inkişaf etdirmək olmuşdur.

Yay məktəbinin birinci həftəsi Tbilisi Dövlət Universitetində təşkil olunmuşdur və aşağıda qeyd edilən multidissiplinar mövzuları əhatə etmişdir: “Mədəniyyətlərarası kommunikasiyanın əsas anlayışları - sosial psixoloji perspektivlər”, “Mədəniyyətlərarası kommunikasiyanın əsas anlayışları - antropoloji perspektivdən”, “Streotiplər”, “İctimai münasibətlər və mətbuat”, “Mədəniyyətlərarası kommunikasiya - eşitmə qüsuru olan insanlarla münasibət perspektivindən” və “Mədəniyyətlərarası kommunikasiyada tərcümənin rolu”. Əlavə olaraq, tələbələr Beynəlxalq Miqrasiya Təşkilatının Gürcüstan ofisində olmuş və Cənubi Qafqazda olan miqrasiya prosesləri ilə bağlı ətraflı məlumat əldə etmişlər.

Yay məktəbinin 2-ci həftəsi Oslo Metropolitan Universitetində təşkil edilmişdir və aşağıda qeyd edilən mövzuları əhatə etmişdir: “Niyə norveçlilər bu cürdürlər?”, “Mətbuat və qlobal mədəniyyət”, “Sələfilik - Norveçdə yeni dini gənclik hərəkatı kimi”, “Mədəniyyətlərarası kommunikasiyanın əsas anlayışları - sosial psixoloji perspektivlər”, “Qaraçı xalqlarının təhsili” və “Tolerantlıq və hörmət”. Bundan başqa, tələbələr Osloda Refstad İmmiqrasiya Mərkəzində olmuşlar. Miqrasiya mərkəzinə səfərin əsas məqsədi Norveçin miqrasiya siyasəti və sığınacaq proseduru ilə tanışlıq olmuşdur.

Səfər müddətində tələbələr sığınacaq axatran şəxslərlə söhbət etmək, eləcə də onların yaşadıqları yeri görmək və onlarla birlikdə nahar etmək imkanı əldə etmişlər.