2016-cı il fevralın 25-də Xəzər Universiteti Tarix və arxeologiya departamentinin ənənəvi olaraq təşkil etdiyi elmi dəyirmi masada Azərbaycan tarixinin aktual məsələlərindən olan “Qafqaz Albaniyası” mövzusu müzakirə olundu. Budəfəki seminar “Antik müəlliflər Qafqaz Albaniyası haqqında və Antik arxeologiya” adlandırılmışdı. Tədbirdə Xəzər Universitetindən, Bakı Dövlət Universitetindən və Pensilvaniya Universitetindən, eləcə də AMEA Arxeologiya və Etnoqrafiya İnstitutundan peşəkar və gənc tədqiqatçılar iştirak edirdilər.

Seminar 2015-ci il dekabrın 18-də keçirilmiş “Roma imperiyası və Cənubi Qafqaz” mövzusunun məntiqi davamı kimi tarixi tədqiqat metodologiyasından başlayaraq, qədim mənbə və qaynaqların təhlili kimi bir sıra maraqlı və mühüm elmi məsələlərin müzakirəsi ilə nəticələndi. Seminarda amerikalı arxeoloq Lara Fabianın tədqiqatı və antik arxeologiyanın bir sıra elmi problemləri üzərində fikir mübadiləsi aparıldı və yeni baxışlar gözdən keçirildi. Tədbirdə  Fərda Əsədov, Mübariz Xəlilov, Rüxsarə Quliyeva, Lara Fabian, Roza Arazova, Orxan Zamanov, Yeganə Çağlayan kimi mütəxəssislər iştirak edirdilər.