2018-ci il fevralın 27-də Xəzər Universitetinin Mədəniyyət mərkəzində görkəmli muğam ustadı, xalq artisti Arif Babayevin 80 illik yubileyi münasibətilə mərasim keçirildi.

Mərasimi qısa giriş sözü ilə universitetin Musiqi və incəsənət departamentinin müdiri - əməkdar müəllim, dosent, pianoçu Zülfiyyə Sadıqova açdı.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı geniş çıxışında Arif Babayevin qədim və zəngin muğam ənənələrinə əsaslanan özünəməxsus ifaçılıq xüsusiyyətlərindən, özünün də iştirakçısı olduğu səfərlərdə xarici ölkələrin tamaşaçıları tərəfindən sənətkarın böyük rəğbətlə qarşılandığından danışdı, yubileyi münasibətilə onu təbrik etdi.

Dosent Zülfiyyə Sadıqova Xəzər Universitetinin kollektivi adından professor Hamlet İsaxanlının imzaladığı təbrik məktubunu oxudu. Yubilyara gül dəstəsi və hədiyyə təqdim olundu.

Xalq artisti mərasimin təşkilinə görə universitet rəhbərliyinə və iştirakçılara təşəkkürünü bildirdi, tarzən Ramin Rzayev, kaman ifaçısı əməkdar artist Mirnazim Əsədullayev və skripkaçı Fərid Abbasovun müşayiəti ilə muğam parçası ifa etdi.

Tədbirdə universitetin rektoru Hassan Niknafs, Tədris işləri üzrə prorektor Məhəmməd Nuriyev, İdarəetmə və tələbə işləri üzrə prorektor İsaxan İsaxanlı, dekanlar və departament müdirləri, əməkdaşlar iştirak edirdlər.